يقال ان الشاعر سالم عبدالله له ناقة ذهبت من الهيشة الى مرادة وعندما ذهب لإحضارها

فمازحه شاعر من اهل مرادة بقوله( ابدلها لي بي مجموعه من الماعز) موضحا له ان الماعز من الماعز الغالي الثمن فرفض الشاعر ان يبدلها وبعد فترة ارسل لة هذه القصيدة

 

البل كسبها واعر ومر شقاها .. غوالي ومانا قادرين بلاها

مايكسبها  .. اللي يدير فحسابه وضيم تعبها

اللي كان شامت عندها يهلبها .. ماي ساهله عنده ايموت وراها

واللي عمر مادقره سفي مشربها .. ع الكتف لاتومج اللمن لاقاها

ولاماجدب شور الربيع لغبها .. نين عاودة منه اطوال اذراها

ولا للمجاور فالجهيم حلبها .. امنيين ماترزم عالحوار وجاها

ولافي سبيل الصايبه يجلبها .. ولا تفك عالمضايقين احذاها

 

 

اسماها مرة وحلوة  .. وحنظل عاقدة ومضرة

اخصارة ومكسب كلهن في صرة ..  وبين الرخاء والكرب مد اخطاها

ولاعمر جابوها ابقص الجرة  .. ولاوطن يمسكها علي مرباها

تفهم وما تنطق ولا اتورة  .. اجواد غير ماتعرف اترد الغاها

لوكـــان مـــاي حشيــــشة .. وعادة الناس ايطاردو لمعيشه

ناقة اتنقل من اتراب الهيشة .. نعمد مرادة مرتين وراها

وين تنطرى سالم يضم قشيشه .. سوا واكده والا غشيم طراها

ونا زاد عندي فالبساط حشيشه .. كيف ما البل تطلب علي مرباها

والبل خير عندي مالقلموالريشة .. وحيات الحضر عندي رقيق سداها

واللي هذا بردة في جهامت ريشه .. واللي تناسبة صنعة ايموت وراها

 

 

فيـك فضيـلة .. اجواد عمر ما قالو الناس بخيلة

ايام قبل كنتي للرحيل وسيلة .. والحرث وخشوش الخلا تلقاها

ويجيبو بناتك مالبساط خويلة .. ماعمرها كرت احبال وراها

وتحوس فالعدايل عندها تخبيلة .. واتطيب طيابة صحيح اسماها

وتفك المرده ضاعفة وهزيلة .. وتقبل معا جفجف اتمد اخطاها

وتجيب مير هلها من تراب زويلة .. ومنعند الجفر يبطل اللي حاذاها

ويجي راكبك بين العراء وصيلة .. اتهز وهزيزك للعضام شفاها

الله يسامحا مية هنا تدعيلة .. اللي فكها من وسط خيل اعداها

وديما علي لجواد عندي هيلة .. ومعا جيب سيرتهم انجود امعاها

لجواد يوم اللي اذاب ثقيلة .. ايشيلو الطايح والكبود دراها

لا خوف عندي لاطمع لاحيلة .. ولا لوم لايم كلمتي نخشاها

صغير سن لاكن كل شئ واعيلة .. وعارف الدنيا برها وسماها

والناس تنتهي والقاعده لاصيلة .. واخيار العرب تنسب علي مبداها

اتجرك الدنيا وتاخذك بالحيلة .. واللي اتطير تنزل عالوطا مرساها

خطرها الاسيرت بات اكحلة .. اللي بقهرها مال الزمان صغاها

اليوم مالجرب تمت اتنوس هزيلة .. واكثرها غفال ولسبيل ضناها