غلاك الخافي الشاعر القدير رمضان العوامي.

♦غلاك الخافي **لا أقدرت نشكي لا أنحل أكتافي**من يأسك ومن لوعة

غلاك ونارك ** وريبة مواهيمك وخلوة دارك

سبايب أمراض العقل كمو اسرارك ** من قل الملاوذ والحنون الدافي

والياس هو اللي طفا زها نوارك ** واصبح ذبالا ياعزيز وهافي

وخالف مهاويدي علي مظهارك ** حتي مرامقه ماجيت يوم أصدافي

وحرم انظورك مو امغير مزارك ** حتي في المنام اللي ايجي للغافي

♦غلاك الضايع ** فوق من أحراب الياس دمه شايع

بغيض شنتلنه نين ذاب مزايع ** وبات في خلا يسفي عليه السافي

وهو لو غوايا لو مراضي مايع ** لفعل الدنيه بالخطي متلافي

الا ما حلال بنص كل شرايع ** ولاعرف لاعادة أكرام اينافي

بنيته وماعندي وراه تبايع ** ولا للخطيه ينتصب مندافي

غلاك مو شرا لاني احطامه بايع ** لا انبدله لا نتصف بالجافي

ولا نرتضي خونه وشين دنايع ** وحال غايتي نتبع طريق أسلافي

صلاح جدهم مشهور باسم الطايع **انظاف النوايا والضمير الصافي

بيض الوجوه اللي الذاذ طبايع ** شواهر المصلي هل الدين الوافي

♦غلاك وحاله ** من ياس مارفع بيده وبدري داله

في جوف صحرا موحشه جلجاله ** وقور سود كيف أنهن أقدور مكافي

ولأنظره شاهد كان قلت انساله ** وانجت للدلايل ما دليلي كافي

وانجت للجهد ماشي ريد اناله ** لاني سريه لا اقران صفافي

وعارك الخاطر نين شان خياله ** وحادفت لكن جا قصير احدافي

♦غلاك وقلا ** في خاطري مافيه شي ماثلا

لوكان فيه ما نشقي بجيب امعلا ** وكل حين تجدد عليه اوصافي

وهو فاتن غادي وفوق تعلا ** وتما علامه شاهره لغلافي

والعارف تفاصيل الكلام اتملا ** والشاره غنت عن مقصدي لأهدافي

وتبقي نقيده لو أنظهر كلا ** جميع ماخزنته في امطمر كافي

♦غلاك ونوحي ** و م الدوج كاثر ياعزيز أجنوحي

ويبقن ايهدن خارمات اميوحي ** امباجيد نقطاعة أسراب ارعافي

ولابي مرض لا قل لا مربوحي ** ناقص ولو قاصر علي اللحافي

إلا ما الخاطر في خلاي أبروحي ** يبقي ايفتش في ظلام أرفافي

ويجبد غلاك وضيعته واجروحي ** م اللي بالسوايا سودنوه نظافي

♦غلاك الخافي ** لا أقدرت نشكي لا انحل اكتافي