من الموروث الأدبي

 ::  ::  ::  :: 

ملحمة شعرية

في سنة 1930 م كان مجموعه من المعتقلين في معتقلات الاباد الفاشية في برقة تم تشغيلهم كعمال بالسخرة من الحكومه الايطاليه في رصف الطّريق بالحجر في منطقة الخرمه وفى القصيبايه بالتحديد شمال منطقة التميمى بمسافه لا تتجاوز ستة كيلومتروللتحديد اكثر عند موقع هؤاى الاذاعه وقبل شروق شمس في احد ايام فصل الصيف

 

 راى الشيخ والشاعر حسين مسعود بونضاره الغيثى لعبيدي ناقه تصحبها بكرتان قادمتان من الاتجاه الغربى اقتربت منه او اقترب منها وبصحبته بعض الرجال نذكر منهم المرحوم الصالحين محمد شحات الذى عرف الناقه من الوسم الذي علي وجهها انها لاحد افراد قبيلة العلالقه العبيدات وهو اى شاعرنا لم يشاهد أي ناقه فى الفلاء منذو ان جزء به وبقبيلته بمعتقلى الاباده الجماعيه بمعتقلى البريقة والعقيلة تنطلق بحريه الا في ذلك الصباح وكل من صحي من نومه وراء الشاعر يقف امام الناقه اتي ليلقي نظره وعرف احدهم اسم الناقة قائلاً ان هذة الناقة اسمها { ام الهردق }

 

الشاعر حسين مسعود بونضاره

اهلاً صباح الخير وانستينا :: الله كريم يا ناقة اللي جيتينا

جيتى بيدك  :: لا امعاك راعى لا ايطارح سيدك

ولا سبيب لا غاشى ايعانى كيدك  :: نهار فيه ما تطرا الا بالزينا

ايام الزمان اللى برم ويريدك  :: ودال التريس وكل شى له حينه

وخطور المواجع والشقا ما فيدك  :: واللى ع الجبين امسطره راعينا

وحكيلى اخبارك اوضحى باكيدك  :: وخبار غوشنا والجار واللى اجينا

 

الناقه

حال اشيب  :: حال غوشكم فى وطن شين امريب

حالهم عطيب اوقتهم موطيب  ::  عايشن عيشتهم رديه شينه

واللى كان ينها ع الخطا ويعيب  ::  تما حطيطه ما ايعين ابعينه

واخذ الشعراء بالمشاركة في هذة القصيدة

 

 

الشاعر عبدالجواد سليمان الطائع فقد اضاف :

امنين لفيتي ::  ومع اى المخاسر بلطتك كي جيتي

الناقه

عقاب الليل كزت نيتي  ::  اوهفن منازل فأيتات علينا

أياماً اوشور اسيادنا مجريتي  ::  اللي اشراف من جرت افزاع نبينا

فكيت فكت السارح ابصفوة نيتي  ::  اوكتب الله نجاتنا ونجينا

وهلبت القربوه بعد قابيتي  ::  من غير الوقا شال الحمول علينا

وقطعت الحجاج ابقوتي اوعفيتي  ::  وفرحت وين ما تاقن الروس علينا

هلبت الطايل  ::  والكازي اللي ديمه ابسوطه عايل

دبيب وطن في نيتي عليه ولايل ::  وانشاء الله يجود الله ويهنينا

الشاعر

بالله كيف فتيهم ارعاة سلايل  ::  احكيلي عليهم حالهم ورينا

الناقه

تركت السوط فيهم عايل  ::  واللي يقول حص العيب فيه اوفينا

مطراهم ايبكي ما عليهم سايل  ::  ولا قلب رايف كان تنشد فينا

اجواد جبد ذكراهم امغير علايل  ::  مزرورين يرحمهم الله اونبينا

الشاعر

ليش سيبتيهم  ::  صوبك قليلة خير ما جبتيهم

الناقه

رسول الله لا تطريهم  ::  اتذرف ادموع العين وتبكينا

حتي اقلال الناس شافو فيهم  ::  حرابي اكبار الناس يا فندينا

امويله وراف الله ايحادو فيهم  ::  بسيطان حاكمهن الله علينا

اللي كان في البلغه البس فيهم  ::  اليوم هم اصحاب الشان والشبلينا

الشاعر

لا اتك دي  ::  هذا شي رايدبه الله ايعدي

ويجود الكريم اوع العيون اتردي  ::  ويندم اللي بطال داير فينا

وغوش الحرابي من علية اتمدي  ::  وياقف اللي له دين ياخذ دينا

ودوري ابكيفك ما عليك اتعدي  ::  بعد هالحال اللي اتراعي فينا

ونحن في المخادم حالنا متكدي  ::  وشوفي افعال الماصة في ايدينا

يا اللي وسيلة للحجاز اتودي  ::  لا يوجعك ميل الزمان علينا

 

 

الشاعر سالم عبدالرازق البنكة الغيثي :

قل اعدادك  ::  اشويتي فنن روسك مع ميلادكك

كمين صف جاء غازي اريد ابلادك  ::  جلاء غصب لا هنتي اولا هنتينا

اما هذه دولة موش ضد اسيادك  ::  ولا غلبها يوجع اولا ايكدينا

الموكر جابك  ::  جيتي بلا سواق جاك اخيابك

حتى الوطن كى تقتى عليه زهابك  ::  ومسع امحاذاتك نهار انسينا

على هول هالب خرفوبسبابك ::  انتى تشهدى

مصباح بو قرامي من عضا شيابك  ::  وابراهيم بو مصباح كامل زينا

كمين فارسن يوم البلا يشلابك  ::  دفناه في شط الرمال اوجينا

يا جوابه  ::  شيالة اللي باطل امعاه شرابه

خاطر عليك الوطن هو وصحابه  ::  وعقابك هتايه في الدفوف انسينا

 

 

اما الشاعر صالح احميده المنصورى والذى يذكر بعض الرواه وعلى راسهم ادريس على المصرى انه هو صاحب البيت الاول اى راس الملحمه وهذه الابيات التى يقول فيها :

 

 

الشاعر صالح احميده المنصورى

جايه من غادى  ::  سوط القربو جابنى ع الوادى

لوريت سوط ونيس يا سوادى  ::  داير حرايق فى التريس اوفينا

الى دالهم ضالم عليهم عادى ::  وانتوا حالكم يشغل كذا حاكينا

الشاعر :

حالى طيب  ::  واليوم هنا يا ناقه القيت اغريب

لفينا عليه صاحب اسوالن طيب  ::  يبقى غير بفراجه ايبشر فينا

شبلينت العدو فيده امغير امسيب  ::  لو تارك الدوله ولو امشقينا

 

 

الشاعر امراجع بو فراج بوقفة علي الرفادى

وين ما هليتي  ::  كل التعب وهمومنا نسيتي

اوين يا اكحيلا شورنا لفيتي  ::  جرينا انلاقو فيك ما راجينا

خطرتي كسوبتنا ايام عفيتي  ::  أيام الشباب اللي امعاه زهينا

الا اليوم من ضلم العدو حقيتي  ::  اصبح سواد الراس كي الشنينا

باله خبري ع الوطن كي راعيتي  ::  وحكيلي عللي حالهم طانينا

الناقه

الوطن ما هو لول  ::  تبدل ابقي صايف ربيعه حول

ارياح ابعجاج اليوم فية اتعول  ::  والبوم وكر فيه دار رطينه

وتما خراب وهم مو متحول  ::  من ضيم العدو هالي تحكم فينا

وهلكم ايعانو في شقاء وتهول  ::  جوع او عطش وخري امراض دفينا

علثر العذاب اللي عليهم طول ::  بنواعه وما قالو ايهون علينا

والوطن غالي ما عليه اتحول ::  الموت خيرلنا ان كان جفينا

دعيت الكريم ان هالحال ايحول ::  هو الي عليم وهو اللي ناشينا

رحيم اوعظيم الشان له نسول  ::  ايفرج علي هلكم اوزاد علينا

عليهم ديمه  ::  نبكو وما لنا اقرام عزيمه

في كل ساعه دايرين جريمه  ::  ديمه وفينا سوطهم غاشينا

ولكن بعد ريتك وبعد تسليمه  ::  ارتحنا اشوي وله الله دعينا

افرج علينا من احكام ظليمه  ::  ويعود وطنا والخير واهلينا