الشاعر الراحل ادريس الشهيبي

 

ايجن اوقات يضايق العقل اجمامه .. وتجي صورتك بينه وبين منامه

صورتك مجملها ..بكل المعاني ربنا كملها

وانتي مغير ضلك ع الوطا يجعلها .. يزها ربيعها تلبس جديد اعمامه

وانتي بنتك فوحة ازهار جبلها .. والفجر يطرد في افلول ظلامه

وانتي بسمتك تعجب الله يقبلها .. اتجلي علي حيل القلوب غمامه

وانتي نشوتك ما كل حد يوصلها..  ولا تسكري ماي اقطاف كلامه

وانتي زعلتك تخرب ابلاد ابهلها .. اينوح بومها تصبح امغير عدامه

وانتي نظرتك للعقل مايحملها .. يدردر سماه وينقلب برامه

وانتي منقضك يقلب اعلاها اسفلها .. يخلي جميع الفايته قدامه

وانتي دار في قلبي الزمان نزلها .. انكان تم صاحي ونرقد جثامه

انتي غيتك لازم ايشيت عللها .. حتى انكان تميتي لعيت نعامه

واللي من اكبارك هذي مايجهلها .. انتوا قبل لنا قرعة القسامه

واللي في غرامك مات يستاهلها .. سلاك في اديونك و النعيم اختامه

ايجن اوقات يضايق العقل اجمامه ..وتجي صورتك بينه وبين منامه

صورتك مردوعه ,,.. تمثال من ذهب خالص وكامل نوعه

بالك اساع ايسير من مشروعه .. الخاطر ويزهابك عقاب ايامه

وانتي زايده عنهن جمال وروعه .. الخاطر علي حبك حلال اصيامه

ايجن اوقات يضايق العقل اجمامه.. وتجي صورتك بينه وبين منامه