♥الشاعر غيث القرقعي ♥

 

ماضي الملتفتين شور بعضهم...خطر في امﻻقاهم ورق غرضهم

وهي الحقيقة .. املاقة رفيق وجاء اصداف رفيقه

تبهيت ملتفتين مالتشويقه .. حتى كي شكع لفلاش ما غمضهم

ويسلم اللي صور هذيك الليقة .. نين عالعقول العامرات عرضهم

صور املاقه ما ايطول دقيقة .. عرب واجدة هيضة بحر هيضهم

ماضي الملتفتين جيب سريبه .. ما اوعيت فيه ابصدق نين انجيبه

لكن الصوره هي اللي تحكيبه .. ماضي الحاضر فيه ما عوضهم

تهايالهم طيبة زمان الطيبة .. اياماً وجار الجار ما يقرظهم

و تهايالهم بارق خبط شابيبة .. في وطن عشري هو دواء لمرضهم

و تهايالهم كي جوه بام اجنيبه .. لقيوه كيف ماضنوه لمريضهم

و تهايالهم نازل هذيك الصيبة .. اللي مالنقايص حافظه حافظهم

فريق هله كانوا يختشوا مالعيبة .. جنب لضعيف و عالعدو مغلظهم

كم وجه طيب فيه طال الغيبة .. لا اغتاظ منهم عمر لا غيظهم

تهايالهم عيشة دلال و هيبة .. علي عكسها واقع رهيب فرضهم

و حضرة جناب الكبر من توكيبة .. اتقرقيض بايد يا ولد قرقضهم

صار املاقة .. بينهم اللي كانو زمان رفاقة

عليهم خطر ماضي مشا بشواقة .. لازم علي ( جمعة ) أني نعرضهم

سريب ( بوحبينة ) يعرفه سيناقة .. ايقيمه صحيح و يفهمه منقضهم

 

 

 

♥اضافه الشاعر جمعة بوخبينة♥

 

ماضي الملتفتين ما يسيّب .. خطر في املاقاهم اخطور ايخيب

اياماً وكان اللي بعيد اقريب .. هم يقطعو فالجون كيف بعضهم

وناظرين ياما من عرب واركيب .. ايام عزهم والوقت ماعارضهم

ماضي الملتفتين طيبك ماضي  .. ايام والجمل جاضي وسيده جاضي

انكان جيتهم بالبتع تمشي راضي .. وانكنك حكيت ايسيهفك منقضهم

هذي الصادقة ماني الهم متغاضي .. علي كل كاين فعلهم فارضهم

ماضي الملتفتين هابة ديمة .. خطر في امﻻقاهم اكبار القيمة

هشيمة ايبهت في عقاب هشيمة .. يا ( غيث ) وين زمانهم قرقضهم

وهذي الدنيا مي اليوم قديمة .. وماعد الها تامن بعد تلحظهم ..

ماضي الملتفتين كوسك طاري .. خطر في املاقاهم وشد افكاري

الشايب اكباري والغديد اكباري.. اخشوش الفيافي والسفر قيضهم

ماتقول حاجة كرب كانو ضاري .. مارفيقهم عمره مشا قارضهم

ماضي الملتفتين في نوضتم .. خطر في املاقاهم وسهرايتم

بكو نين سالت فالوطا دمعتم .. ونا زاد وقضني الي وقضهم

الكبر وين لحقتني اللي لحقتم .. بكيت غير ماعد بكيتي تنهضهم .

ماضي الملتفتين شور بعضهم .. خطر خطر في املاقاهم ورق غرضهم

 

 

 

♥اضافه الشاعر خليل بو كريبة العوامي♥

 

خطر ماضيهم .. ايام الدﻻل وربنا عاطيهم

السيد والجمل مانيش غابي فيهم ...قدام السدايد في عفاء ﻻحظهم

وريت نجعهم و البل تحوش عليهم .. و ما عمر شي طرقي مشا قارضهم

( ارعيضات ) ما ودك امغير اتجيهم  ... الخمس البيوت اجواد كيف بعضهم.

.ويا انويرتي على يجي غازيهم .. ايبات عالندم خاسر اللي واخذهم

وﻻيم عليا (غيث) قال اطريهم. .. اصحاب وخواﻻً لي مانرفضهم

 

 

 

♥اضافه الشاعر جاب الله النعاس ♥

 

ماضي الملتفتين شور بعضهم .. خطر في املاقاهم ورق غرضهم

املاقا امعا نضرة ابها ذكرهم .. الماضي و رفقتهم اسنين سفرهم

و قول مرحبه في نجع مستبشرهم .. وين اشرفو قدو الاثنين لحظهم

و راقو ابجيتهم و من جاورهم .. اللي عمر ما والي ابعيب قرضهم

و اليوم الزمان ابكبرهم صادرهم .. و جوّر و في مد اللخطا عارضهم

طاغي عليهم زاف و امجرجرهم .. البر البياد و مر هول مرضهم

غيّر عليه الكبر ما قدّرهم .. نفيض بيت باير من ارياح نفضهم

ماضي الشايب و الغديد املاقا .. جمعهم عليهم خطّرا نقناقه

أيام فالفيافي عايشين رفاقه .. أيام عون ما نسم ابماغيضهم

أيام الشباب هضاك في غنداقه .. متجذر ابقوه عالزهاء فارضهم

أيام و ماهم حاسبين افراقه .. و ممشاه من موكارهم رافضهم

جن نازلات ادموعهم دفاقه .. تهييض الامواج الهايضه هيضهم

من قل حيل وكبر ما يتّاقه .. فيهم سكن بالغصب ما فاوضهم

خلاهم هشايم داهشين شراقه .. ما انياط يقنو مالوطا ينهضهم

 

 

♥اضافه الشاعر عبد الرحمن عابد بوجازية♥

 

ماضي الملتفتين فيه غرايب .. حديث صار ما بين الجمل والشايب

اللي هضا فاقد مالزمان قرايب .. علي ما نظر مالغير ما عوضهم

ماضي الملتفتين بين اثلوبه .. اللي يلحظ الصوره ايقول حكوبه

أيام قبل ما كانت عليهم جوبه .. ابعاد في اوهام الشط ما تلحظهم

اسنين عزهم مامنللي زازوبه .. شيل الصعايب و السفر قيضهم

الكبر شين ما عنده دواء حسوبه .. اللي اكبار فالدنيا وطال مرضهم