الشاعر محمد بوسته العبيدي
ايحن الله يابنت الخويل .. ننظر فيك ماعاد لك احساب
انتي في الكون مالك شي مثيل .. وحق الحق ياعوج الرقاب
يا ام خفاف والذروه الميله .. ياما فيك خالق من عجاب
ما اسمح وين يانعم الجليله .. عالفرقان لا درتي احجاب
عاطك نو مالداير نزيله ... سبع ايام شمساهن اغياب
وطنك نين يلعب فيه سيله .. عذب وجل يعزق عالاصلاب
ضي البرق في ساعة هذيله .. ريتي فيه يا خوره شراب
نضتي ليل قدامك طويله .. وعاد الزند يتلن في العقاب
ماح النجم شميتي اكليله .. رذخ الجل وانزدتي اعطاب
خط الفجر طلتي في قليله .. قرن النزل يكنس في اجداب
رضتي فيه وكلا الهزيله .. قبل الظهر هلت في القباب
بلط من ماه جبيتي وحيله .. قبل اتجيه ماكنتي غواب
ازياقه نين هالب من نقيله .. ميح السيل جايبله اتراب
دار ربيع في الارض المحيله .. رمثه نين غابي في الاعشاب
رغل ورقط متخابل وحيله .. نسنس بان في المسهى بشهاب
والضمران هو منية اكحيله .. واشقاره كي لون الضباب
موش اللاز ينبت في نجيله .. مسفر نين من بحث الكلاب
شولك شال من نيب نشيله .. اوباره طاح من زينه هذاب
مالقحوان كي طب العديله .. طوله بدن زادن مالخياب
وكيف الثدي بالثفنه اتشيله .. حين حليب يطلق عالاجناب
وعاد البكر ماكانت بخيله .. ولدها اروي سيبها اسياب
بريت بري من صحة ذميله .. وعاد اتهم في المصبه الناب
عبس فراز يقطر من عسيله .. وين اتحك يقعد في الاصناب
طال الورك في المبرك شليله .. من الملاح لعند اللباب
كي الهدوم اوبار الهبيله .. غابي فيه مطراح الحقاب
حمر وربد من صبغة النيله .. وين اتبان كي اخشوم السحاب
وفيها بيض كي ضي الفتيله .. ولا بر نازل في اكواب
وين القيض يزايد شعيله .. والحلاب يجري مالسراب
اتحق الحشو كي شغل العويله .. الملتمين يقرو في اكتاب
ريح العصر لهبت رزيله .. وشم الطفش هو وقت اللعاب
ايجيه الليل واتحق الرعيله .. هي الحنون خافت مالذهاب
كيف الرال في ساعة جفيله .. ولا قمح قارب عالطياب
وفيها ثلب فادر من ابريله .. لو امعسوف لا طاله اداب
ثلاث اسنين يرضع غير جيله .. لا نفوه عاقب من اجلاب
اربد حمر كي تمر النخيله .. واكتوفه زرق كي ريش الغراب
عالي فوق كي اتجيبه الحيله .. تهلب غير يادوبك اتهاب
امهذمل وين ما اتصادر اتجيله .. تحلف عبد لابس غير كاب
تملا الايد من زربه وذيله .. في العرقوب طايل والرباب
والمنقار في شاعة ذميله .. والباكور جايب من عكاف
بوقنبوع والذروه صميله .. وخفاف اعراض كي اذروع النشاب
وين ايزوم يربيك بدقيله .. حبشي ايشق في ساحة اضراب
انزق الناب وايشدك صكيله .. رحاه وخف مكبوص الجراب
يسحن فيه والقصره ثقيله .. مامن قطع من زوره خراب
ثالث فطر والرابع اوتيله .. بوحجلان ذرعانه انصاب
وبنصفار يضون كي الريله .. عالبيطان يلحقهن اقشاب
لودشاع ينهش في الضليله .. ولاهو شين ياذي في الدواب
ولاهو شعث يفرق في الزعيله .. ولا منزور يفزق في الشذاب
لقحه لف وين جاه ليله .. عجرم فيه بازراره اطاب
اتقول اقصور في قريه جهيله .. احشاره وين ماروح اسراب
وفي الميلاد ترتاب البهيله .. عليه اتخاف من غدر الذياب
وين اتفز لهبته دليله .. اتهيض وين ما منهن ارتاب
قبل ايطول ثديا كي البيله .. ازردم حين وينشب اشخاب
وين عليك يخطم،في غليله .. خشمه فوق كرق الحراب
هي وياه رفقتم قتيله .. مي من تو للفالي اصحاب
نجعك وين ماقوفل رحيله .. شضيتيه ماقلتي اغلاب
عام الشح تميتي وسيله .. تجيبي فيه سيال اللعاب
وتجيبيه بوهلعه ذبيله .. في الكرمود بقاص الكعاب
ياام حداج ياطب العليله .. بتعك هيل جيابت اصعاب
ياالفروق مانك للوذيله .. حسد وشين واوجهن انكاب
هلي سود من جوه وغيله .. جد لجد وراثة اسلاب
عزك نجع من صلب القبيله .. خوال وخوت منسبهم اقراب
وسيدك فوق من حره تليله .. كيف الفور من طقر الركاب
ابدير اتقول لبسه نبيله .. خادم غير مازلت شباب
ايعز الضيف ويفك الذليله .. يومن فيه المنحس اذاب
انجا شواف مايترك سبيله .. ياخذ فوق من حق الطلاب
سمح الدي هو جملت العيله .. مسمح وين يسفاه النقاب
انعز القول و وبصاحب عزيله .. ماينجر ديمه في الصواب
وعليه صلاه صلاها وكيله .. نبينا عد ما لم المناب
ليست هناك تعليقات:
إرسال تعليق