عليهن ارسوم فيهن بدع ناشيها
اوّين هل نجوع كانن شهير نباهن
اوّين الصحابا والرسول نبيها
وينما نجيهن جايل
ديار نجع بوسالف سفاه جدايل
وهو له مدايد من جباهن شايل
مسافه كبيره لاورا نمشيها
ورا زول دونه وقت ماضي حايل
وحالت اسباب اخرى وما نبّيها
ونا، راه قبلي كم واحد قايل
اللي فالحياه اتسيرلك تحكيها
وينما انجيهن طارب
ديارهم انعاود من جفاهن هارب
القيته بعد لولاف سوقي خارب
طيلة أيام العمر ولياليها
وسامع وناظر فالحياه تجارب
ادّور عاليمين وعاليسار ارحيها
دروب خيرها ان راضت ايديرن سارب
ونكان برّمت تاخذ اللي اتعطيها
وينما نجي زايرها
ايبانن مواير بيش نذّكرها
منازل هذيك اللي نظيف بشرها
اللي قبل كان العقل والع بيها
احزام من اتنال الفوز يوم ندرها
ان فاجت يجي داير وجيج نصيها
تجّوشن امنين قرن الركاب طقرها
تعجب الناظر عند شيل ايديها
غريب وصفّا سابق متين ظهرها
اموالف علي جيب الفخر راعيها
وينما نجي زاير منازل هلها
ونا كنت ناسي سيسبان عللها
اخطور من اسّفن عالكتوف خجلها
يكثر ونمشي علتّي كاميها
ستين سنه بين عقابها واوّلها
مرّن وعدّن يا شقا قاريها
سيرة اولاف طول الخلاف قتلها
متخاطيين كلّتنا مشى في جيها
وبو عقل قالوا قبلنا قايلها
را النار ما تاكل الّا واطيها
وينما نجي لمكانه
نبقى تقول زاير يا عرب جبّانا
فريق حفر ناياته اغبي سبحانا
نذّكر سهاري خاطري ناسيها
امعا من يعدوا قرعة الجيعانه
هنيه اتبات وزادهم ياتيها
الجار لطرفي جيرة عمام افلانه
لوكان تبقى تنشرا يشريها
.. وينما نريد انجيها ..
.. نهاب جيتي لدارهم وماهم فيها
. .. اعزاز باعدو ..
ليست هناك تعليقات:
إرسال تعليق