الشاعر :- غفير العرفي

نحنا باديه مانا ربات مدينه  ..اجواد نفرحوا بالضيف كيف يجينا .. مانا اربات احضور .. ولانا امنلي بايعين الدور .. ماسكين مصبانا اتقول صقور .. ماعمرنا رزق الحرام كلينا .. واحد ملا بطنه ودار قصور .. وواحد ارويقد ريح طالع دينه .. سيور البنادم قبر بين قبور .. مايدوم فالدنيا الا بارينا

 

مانا ربات بلاد .. ولا نعرفوا حاجه الا الجهاد .. اسماح الواتا للضيف والميعاد .. ان جانا الخاطر نذبحوا السمينه .. نا نقولك مافي كي الاجواد .. يزابوا زبا يا صاحبي عالزينه .. ما يبخلوا حتى انخص الزاد .. سوا واجده ولا تكون ضنينه

 

نحنا اللي حماله .. ماعمرنا درنا اللي بطاله .. لكن الدنيا كل يوم بحاله .. عليك تنقلب مابين حين وحينه .. مامنلي ما تحس في والي تجيك قباله .. ماي ناجيه منها ولا تركينه .. هابا علي موالها .. الدنيا قليلة خيرخرب جالها .. ماعمر شي جراي قالوا طالها .. انكان برمت تقطع سلاسل مينا .. ماحد بناخيها ولا حد خالها .. مامن اللي منها اينوس جرينه

 

مانا اربات صبايا .. ولا نرافقوا فاللي عديم اربايه .. عشنا مع شياب حد الغايه .. علي حالنا ديما يوصوا فينا .. دون ليبيا خشوا النار حفايا .. مامن عدو نحوه عالفرنينه

 

نحنا اللي صباره .. مانجفلوا وقتا يجوا النصاره .. ضرابين للعايب علي منقارا .. دون ليبيا مامن نهار عطينا .. اللي عندها قوه وكم طياره .. ايطاليا نهاية الامر وحلت فينا .. فيهم كلام الشكر مش خساره .. اللي جاهدوا عندهم حقوق علينا .. اسماح الفزع وقتا اتسير الغارا .. تاريخهم يانا عليه حكينه .. مازال قاعد كل حد في داره .. في ناس سراقه وناس امينه .. اللي يديرها الانسان ما توارا .. جهادنا شاهد علي ماضينا

 

نحنا اصحاب الطوله .. واللي مايريد الوطن مانبوله .. تابعين مو قايل الله و رسوله .. رزق الحرام حرام مايغرينا .. ولانا منلي يسرقوا فالدوله .. اللي ناسيين الموت والتكفينه .. ربك كريم وهو اللي نشكوله .. الا العبد مو لي مشكى ولا يعنينا

 

مانا اربات سماطه .. لا نعرفوا حيله ولا زقاطه .. هالفارسن للقوم ما يتواطا .. دون ليبيا مامن نهار عطينا .. الا اليوم حالتنا الها النشحاطه .. حتى عطيب الناس متحدينا .. جانا اللي لعاط من اللعاطه .. اللي قبل ما يقدر يدب علينا .. هذي هي قصتهم .. اطوال العنا عالجار والمتيتهم .. جيب الفخر الجود هي صنعتهم .. فراسين ما يقدر عدو يغزينا .. مالهم مثيل ولا الناس فدتهم .. ولا نريد نبقوا كيفهم ياخينا

 

مانا ربات نذال.. ولا بالحرام نبدلوا الحلال.. فراسين فزعتنا تجي عالحال.. دون وطنا برواحنا ضحينا.. مالنا مثيل الا ولاد هلال.. اللي ماعرفنا عرف يسمع بينا.. كسابين للطوقه واولى البهال.. ركابت اللي يعاتي قصير قينه.

 

مانا اللي بعناها.. ليبيا احتلت غير حررناها .. علي شانها هانو الروح ضناها .. علي اجهادهم يشهد النهار بنينا .. حالفين له بيمين ما يهواها .. مانا امنلي من العدو ذلينا .. نحنا باديه مانا ربات مدينه  .. اجواد نفرحوا بالضيف كيف يجينا .