سمحة والخاطر غاويها .. عاشق فيها وديما ديما والع بها سمحة

سمحة والخاطر ولاته .. طول حياته طير وهي عشه و مباته

هي سر احزانه وزهاته .. روحه فيها وين ايغيب ايحن ايجيها

بالود الغالي وداته .. و امواريها ما بين اضلوعه طاويها

خايف من عين الشماته .. يا عاطيها حجب يا خالق واحميها

هي نور الليل وظلماته .. و متمنيها شمعة ما ريح اتطفيها

سمحة والخاطر غاويها عاشق فيها ديما ديما والع بها سمحة

سمحة وتستاهل شتاوة .. زيد غلاوة والمجروح بها يداوى

هي بيت قصيد و غناوة .. و انغنيها ترنيمة حلوة هاويها

حتى حس العود تقاوة .. كي نطريها ايدندنها وايقدر فيها

سمحة سمحة سمحة والخاطر غاويها عاشق فيها ديما ديما والع بها سمحة

سمحة واجد حد الزين اتحل .. العين قمر ليلة عشرة واثنين

عليها الاشعار دواوين اتمجد فيها تستاهل وايخيل عليها

وهي تلهب في الفنانين وين اتجيها تلقى سحر الدنيا فيها

سمحة سمحة سمحة والخاطر غاويها عاشق فيها ديما ديما والع بها سمحة

سمحة واسماح صمايلها يا مجملها بالزين الله امكملها

والوقت امواتي ايدللها وامعليها لفوق و زاد امحليها

وانا في الخاطر شايلها شاقي بيها بالسوم الغالي نشريها

نا عيني صوبك دابلها يا داويها يا خافي رانك تعميها

سمحة نا روحك ماطولها ذوبتيها كبدي بالنار شويتيها

سمحة سمحة سمحة والخاطر غاويها عاشق فيها ديما ديما والع بها سمحة

سمحة ياللي ما تعرفها لك نوصفها فازت بالزين و مالطفها

تستاهل قول ايشرفها وايعليها وايغازلها وايناظيها

جذابة مصيون شرفها ما يطريها والي بالعين ايواطيها

لا ريح الدنيا تجرفها لا تغريها لا هي طماعة وسفيهة

واللي بعيونه شايفها مَن عليها يقول شوية وصفك ليها