(أقلام عطيه)

♦بالله يا فرج دونك الها القضيه .. راح وطنا ريحت أقلام عطيه.. ودرو بوعجيله..  شالوه شيلت قوم شيلا بيلا.. هظا وطن في همه ابقي تبيلا ..  افداك يا عطيه ما اتعدل هيا

 

 

♦اضافه الشاعر خالد الزول

رايحين قوم الغفره..  ريحة قلم محايته منصفره.. من مصر شرقا لا حدود الجفره..  دراويش عمرك ريت هالبليه.. بالله يا فرج دونك الها القضيه.. قولوا الها الحرباوى.. بالدين ايعطيها شورنا لا ياوى.. راحوا ضنا برقه اليوم شماوى.. ما امغير دين اقلام زرقينيه.. على الله تخلص فوت هالدواوى.. وعده مثيل ابسيس سارق ريّه.. بالله يافرج دونك الها القضيه

 

♦اضافه الشاعر الشاعر حازم الصبيحي

راح حسافة ..هالوطن كي ريحت قلم لسرافة.. لو كان نطرح يا فرج املافه.. ما من قلم عده بلاش هدية.. شوفوا القلم ياهوو من لي شافه.. الا ابلادنا قول خاطري منسيه.. بالله يا فرج دونك الها القضيه

 

♦اضافه الشاعر الشاعر بالقاسم السحاتى

قالوا فم ..عطية امودر كل يوم قلم.. واحنا وطنا ماعاد شى يلتم.. والشارع امعبا فيه كم حكيه.. بالله يافرج دونك وبيه اهتم.. الا وطنا يبي افزاع قويه.. بالله يا فرج دونك الها القضيه

 

♦اضافه الشاعر الشاعر عطيه الجراري

راح بالمحايه.. عطبك علي خشمه عطيه اقرايه.. كل يوم في فصله اتسير احكايه.. عليهم فرج مدير كل عشيه.. علي وصفه قلم مبري بلا برايه.. واللي واجعه مسروق من كوتيه.. بالله يا فرج دونك الها القضيه

 

♦اضافه الشاعر الشاعر جاد الله العوامى

عطيه الوقت اظلمه.. و قالت فقد محايته و اقلمه.. امه و قالت هذا فاتح فمه.. كذا يا صبايا دبرنلى هيا.. نحنا وطنا قريب الصراع اقسمه.. و شايخه عليه اليوم كبانيه.. سرارقه اصحاح اوجوه فيهم سمه.. اللى هذا بالقوا ضبط كرسيه.. وكمين شيخ عيط من صغير لحمه.. و قارض العرب قايل الرز اشويه.. و كمين شاب للتقوى الله الهمه.. لا ايغش لو. قاتل انفوس بريه.. ولا بالحشيش طروه دار اغلمه.. و لا ايرافق اللى ذيل و الدونيه.. عيل نداوى موش طير ارخمه.. بعيد بوع ما ينزل اديار رديه.. كيف هذا يا ريتنا انفوس تقيه.. وكيف هذا متمنى ايكون عطيه.. بالله يا فرج دونك الها القضيه

 

♦اضافه الشاعر مشاركة الشاعر نجيب اميمه

راح مبرا.. ما خط حتى من سواده جرا.. ريحت وطن سالح اليوم تعرا.. طمع في خيراته اخباث النيه.. الي فعلهم منه الجماد تبرا.. غير يافرج من وين يلقوا ديه.. بالله يا فرج دونك الها القضيه

 

♦اضافه الشاعر  صالح بوهريده

راح اقلمه.. عيل اسرافه امغير وفاتح فمه.. باهي اللي ما سارقين اغلمه.. جيبله اقلامة و فكنا من ديه.. بالله يا فرج تاخذ عليه ارحمه.. حاول اتجيب اقلمه هالعشيه.. ضاع وطنا ماعد عليه اطعمه.. عيشه عطيبه ماعاد فيها نيه.. عندي رآي من حاشن الكل اعلمه.. نجح عطية او سكتو الوليه.. بالله يا فرج دونك الها القضيه

 

 

♦اضافه الشاعر سالم خميس العوكلى

قولو البو اسريريق .. جابك الدى اوجا عليك طقيق.. ايدينها اقلام ايفكها ما الظيق.. اويصبر ويرجا نين اتجى المهيه.. وضع الوليه شين في اتلقليق.. وينهى وزارتنا التعليميه.. بالله يا فرج دونك الها القضيه

 

♦اضافه الشاعر صالح عوكيش صالح

راح كله كله.. اليوم وطنا يبى دواء من العله.. كى البيت لاهو رواق لاهو خله.. مفتوح فتحة فم كيف عطيه.. بالله يا فرج دونك الها القضيه.. ياربنا صفيها.. راح وطنا ريحه وعدا فيها.. اللى كى عطيه عابيبن عليها.. باعوه للتركى و للمصرية.. بالله يا فرج دونك الها القضيه

 

♦اضافه الشاعر ونيس الشريف

يافرج مجبور.. راهى قضيه املفقه بالزور.. جابولها شاهد لقوه ايدور.. يشهد على قصه وهي منسيه.. ماشاورو النايب العام الصور.. ادبارة وليه يا عليك وليه.. عرب خالفو القانون و الدستور.. واعطيوه ارتبط اسمه بهاالقضيه.. ويا بورفيق لانقانك مشكور.. على جبدتك ريحت اقلام عطيه.. بالله يا فرج دونك الها القضيه

 

♦اضافه الشاعر جبر الصبيحي

راح قبالة.. من شنطته هفوه شينك حالة.. يا واقي اوخذنا فيه جيل بحالة.. سرقة و سكير بكل عين قوية.. الا من رحم مولاي يا رجالة.. امفيت رحمته هالوطن راح ضحيه.. بالله يا فرج دونك الها ا لقضيه

 

 

♦اضافه الشاعر ادريس الشريف

رايح قلم لبجمه.. عطيه امبلم دوم فاتح فمه.. فتحت افواه اللي الوطن حكمه.. كي سلمو تسليم للتركيه.. و لاخر ايعيط ضانا لو اقسمه.. ضامن امعيشه في حياه هنيه.. بالله يافرج دونك الها القضيه.. رايح عليك حسوفه.. واللي واخذه تعبان ماله روفه.. انكان نبحثو نلقو هضا مصروفه.. مصروف كل من عنده المسؤوليه.. واكل احقوق الوطن قص طروفه.. ما ايرد يربح من ادعى الليبيه.. بالله يا فرج دونك الها القضيه

 

♦اضافه الشاعر بوبكر رافع

راح توارة.. ريحت اللي راحوا نهار الغارة.. ابقي وطنا منها عليك اخسارة.. افداك القلم يكفيك جاك عطية.. بالله يا فرج دونك الها القضيه

 

♦اضافه الشاعر عبدالحفيظ صالح بومريم

مالكم ومال عطية.. قضية القلم حلها ودية.. الا الوطن راه ريحتة أزية.. واللي توجعك مبيوع للمصرية.. والناس فاهمة بالمقلوب هالقضية.. الكويس تهمش في دائرة محمية.. و الوطن راحوا ضناه ضحية.. بين موت او بين فقد للعقلية.. سكير وحشيش احبوب كي القليه.. و لبلاد تمت رايحه منسيه.. بالله يا فرج دونك الها القضيه

 

 

♦اضافه الشاعر جويده القطعانى

دونك الها لمصيبه.. ابها خبرت راها الضروف عصيبه.. بالله يا فرج كنك القيته جيبه.. رق حال شاكتبه او به مبليه.. ايرد وطنا كيف القلم كنيبه.. الجيه اللي ما في بعدها جيه.. بالله يا فرج دونك الها القضيه

 

♦اضافه الشاعر ناصر حسن

ماحد حقا.. راح القلم ما عرفوا من لي لقاء.. الا وطنا عطبك علينا نقا.. البترول واجد فية كي لمية.. اوشعبا جواعا ما لقرش ايحقا.. الخير واجد او ماطول اشويا.. كل يوم في اتردي حياة كدية.. الحاصل اوخذ هالوطن شينك نقا.. وخذت ثعالب الديك في بونية.. بالله يا فرج بهت اله القضيه.. راح وطنا ريحت أقلام عطيه.. غير افلام قروت عطيا.. بالله يا فرج دونك الها القضيه.. أتريد شك أقلام.. قول خاطري يا ناس هو منظام.. من فصل سراقه امعا حسديه.. الا وطنا ميخوذ وخذ افطام.. في عصر خانق قيس وان عشيه.. خطرها الا جيبت كلام كلام.. راح وطنا يابال أقلام عطيه.. بالله يا فرج دونك الها القضيه

 

♦اضافه الشاعر سعيد معيوف

رايحات اقلامه.. كيف وطننا اللي طاح في دوامة.. بالله يا فرج اشقي ودير شهامة.. ودير رأي وأمسح دمعة المبلية.. بالله يا فرج دونك الها القضيه.. يالمدير ريحة القلم موضوع راه خطير.. وام الولد ما عندها ما تدير.. من سرقة أقلام وقلة الماهية.. وبين اللي سراق يا مدير.. بالله يا فرج دونك الها القضيه .. بعد كبرته يسرق الميزانية