♦يا صاحبي ودِي امعاك انخرّفْ ... مليان خاطري ملية غدير امطرّفْ
♦اعقيل اعطيب .. وما تجيي غير اللي الراس اتشيب
اللي توزنا ميزان موش اقريب .. ويطلع عطيب امعاه كي تصرَفْ
لا ترافقا لاعاد يجيك احبيب .. من حاشن عمل روحا خويل امترَفْ
ياما فقدنا من رفيق ايخيِبْ ..كريم وجه يندي مو عطيب امجرِفْ
♦انريد حكايا .. اتحيد جضار العقل حيل الغايا
ونجيب البعيد قريب في سهرايا .. وتسمع جديد مع سهاري شرِفْ
ميط م العرب ما يعرفوا امعنايا .. وجملت سهاريهم العقل اتقرِفْ
لا نريدهم لايقعدوا يالايا .. ونا ديما امعاهم ع الخطا نشَرَفْ
ولا ينهضوك ولا بهم عنايا .. كيف النعاج الراكَه الهكرَفْ
♦غدير في مصلوبا .. بعيد م العرب كاتف عليه اشبوبا
فوق م الطواري عذوتا مصبوبا .. مليان نين الجالتا يذَرَفْ
لا رودا رواد علي مركوبا .. ولا جاه وارد بالقداحا غرَفْ
من قل المماسك حومتا امهلوبا .. في وطن خالي ما عليه اتعرِفْ
♦انريد سهاري .. في وطن منبوتا رتم واجداري
وتلقا العزيب معا محاس حباري .. في رق ساهل موش حيط حجرَفْ
ويبقي عليك الزول مو متواري .. طول النظر فوق السراب امحرِفْ
هاناك يبقي منعدل مشواري .. وتاخذ سهاري في جواب امزرّفْ
يا صاحبي ودِي امعاك انخرّفْ ... مليان خاطري ملية غدير امطرفْ
ليست هناك تعليقات:
إرسال تعليق