خالد ارميله الفاخرى

هو المجاهد الشيخ خالد آدم ارميله الفاخرى شارك فى عدد من الأدوار منها دور قجه ودور المغاربه بقيادة صالح باشا لطيوش وكان شاعرا ضليعا اشتهر بمجموعة من القصائد منها ما هو فى وصف الأبل التى كانت فى ذلك الزمان من أعز ما يمتلك الأنسان و يفتخر به ومنها ما هو اجتماعى وقبلى .

من أشهر قصائده قصيدة عن الأبل يصف فيها كيف أن الأيطاليين قد حالوا بينها وبين مرعاها الذى تريده ابان المعتقلات الجماعية.

فقال خالد ارميله :

بعد امراضها فى عفا دير:: بدرى اشموس والعام خايب

عفا بغو طالق بهارير:: نواره امسوى ضبايب

شماريخ روس البعاثير:: وهن اتقول فلات رايب

اللى اتجيه تنساه واتحير:: هاللى احذاه لاخر يعايب

وتلقى الخلف فيه الخواوير:: على ذراه شايل صلايب

اتقول فوق منه كوادير.. غارقات فيهن جنايب

وتلقى فيه هش المواخير.. تيار ثديها اتقول عايب

جشا حنينها فى التقادير.. على احوارها بالرجايب

نواقيص ضرب النقاقير.. اجراس فيشطه يوم نايب

يبقن الوانها فيه تصوير..تفصيل لونها بالخضايب

البيض كيف قلب الجمامير..اللى نشو باتمار طايب

وفيهن عكاكى دواوير..سبيب سود داير قضايب

والحمر لك صباغ تمغير..واللا دموم سفك النشايب

والزرق كيف فحم البوابير واللا اصباغ نيل العصايب

والخضر كيف طبع الجنازير:: جنان فوق بردى سكايب

اوفحلها ان زف البنادير:: وتمت جلايب جلايب

اتجيه كيف عرض الطوابير:: تشاله امشالات غايب

تحليق الفرق والمجاسير:: عليه كيف طال الندايب

اوهو كيف ما تلبس المير:: اللى من اميار العرايب

برنوس ملف زقزاق بيطير:: نواشين خرجه كعايب

تصريدة انياب الصفافير:: اتجى بقرن منها لهايب

واليوم عند براكة الطير:: جفايا اعراض الجنايب

انتى فيه ما تنظرى خير:: واحنا نزمطوا فى هزايب

ولو كان موتنا جت بتحرير:: امعاهم وفى عون طايب

والقنو فوق سبق مشامير:: جانبات و اللا جنايب

مره اطوحن بالمنادير:: ومره ايخلطن فى لدايب

ولا حبسنا وها التقهير:: وفقدت مسامى حبايب

م المغاربه و العواقير:: اسماح العنا والدرايب

وكسارت اخشوم المناقير:: والطام كل مسرف وعايب

ركابه على كل قنتير:: حصى الارض فى يديه ذايب

غزير النصى بو جراجير:: عالى الصدر وافى النجايب

على مرافقه بو لاشبير:: امنين خمله بالنهايب

قناد للطواريف والدير:: وين ما جفل جن هدايب

وهل بيوت ملفى خطاطير:: واليوم عاد راحن زرايب

اللى ما جلا او خش السرير:: مشى الوطن ثانى غرايب

والقاعدين تحت التصوقير:: وما لهم مع الروم نايب

وحق بواقبب بيض م الجير:: وكل شيخ عابد وتايب

عليهم ان جبت التفاكير:: دموع ناى تمن كبايب

ويخطر علينا مخاطير:: الليل ناخذه بالحسايب

وقال أيضا :

الله يبعدك يا الشيطان..والندا ع النبى هو بديله

كلامى على غوش حبان..سلام عاد ما فيه حيله

سلام جد ما بين لبدان.. اوهى الصاحه مى عليله

سلام عاشرف كيل مليان.. اللى وافى للقصيله

عداد ما نقط نقط لمزان..اوجر فوق م الارض سيله

او الشايب اللى بوه عمران ..مليح العمل والفضيله

سلام ينقرا ف كل جرنان.. اوعلى براغثه فى القبيله

ركاب مثل ديك لاذان.. ايعيط على طول ليله

وكبير قصعته عودها زان.. وللضايف عليها دليله

وعالعيضه فرج بوسليمان.. ركاب كل صبحه سليله

اللى صاحه اتقول نيران.. باركاب كيف نار الفتيله

على طول عمرى ولا هان ..حبيب راه تما عزيله

وعلى المشاركه عيت عثمان.. وعمر كبيرهم شيخ عيله

وجملة لحويل بما كان.. وامخمير وقابس جليله

وعلى جيب عيشه اوغزلان.. اللى هم اصحاب العزيله

ما نعرف افلان وافلان.. اللا كل جار او نزيله

وعلى المقذافه اكثر الدهيان.. القاسى وجملة عويله

خلا لعقلى فتان ضفات.. عالجلاهى نخيله

بوبيوت نضمن اتقول سيسان.. وفى كل بيت حره جميله

ركابه اوهل كسب فى الضان..اونزالة مراضى اكحيله

وثياب صوبها اتقول عقدان.. من لاعيب و التخاويله

واحموده وضاوى العصران.. وباسل اصحاب الطويله

اللى خطرهم بات فى امان.. والراعب يهدى الجفيله

وان صار بينهم يوم زنان.. و البارود ذايب ثقيله

الهن فات له صفر جذران ..على محاس به مقصد العيله

وفى الحال بينه نقبكم زان.. ورا الزين قابل جميله

ربيع كان ما ناقصه خان.. بدرى اشموس كافى نزيله

وهى ضرب لامثال لنسان.. وكل شى نلقا مثيله

وين ايتفكر الجيعان.. واكلاب صاحبه يشتكيله

بدرى الطرف حولى على الضان.. مفروض ع الشلايه دليله

 

 

وقال فى معرض حديثه عن إبله التى تم اختطافها يهدد مختطفيها بعد ان أخذ موافقة المغاربه والتصديق عليها من قبل صالح باشا لطيوش حيث كان خالد ارميله فى أرض قبيلة المغاربه وفى معيتهم وقت أن وقع الأعتداء عليه :

وحق فارز الدين من الروم.. وكل شيخ مرفوع شانه

وفارض الصلاوات والصوم.. على عاتقين الديانه

وحاسب النهارات باليوم.. وكل يوم مشهور وانه

امفيت سيدها يتم بالشوم.. وللا مرابطا بو اخنانه

واللا كيف زراعة الثوم.. واللا العاطله من انسانه

واللا زاد عشى كما البوم.. يعاشر الصغا وكل هانه

الوحده اللى تقول خلخوم.. واللا فرع من عود زانه

وامعلقات فى اكتوفها اهدوم ..من طارف العفا وارتعانه

ان يبقى سبب سوقها شوم.. والحرب بيننا هى اعلانه

وان يلحق على كل مظلوم.. جرر عاملين الشطانه

وان يخلص اللى مات مظلوم ..اللى اقتل بخونة امانه

اللى يحسبوا فيه مردوم.. ويقولوا تباعد زمانه

وان يبقوا بعد لذة النوم.. سمار من فواهق خلانا

وان نغزل غزل مبروم.. مشموط من سعادى امعانا

علايا فراسين واقروم.. فرسان البلا وانزلانه

عقارا لها رسم مرسوم.. تكليف بها مو شطانه

وللقود حق والدين مكموم.. والحق عيب قل اعطيانه

وعارفين ما ايجيبها اللوم.. ولا من امرطب لسانه

ولا خضخت راى مبهوم.. الراى دور واللا احسانه

اوهى تريد عيطات واهجوم.. واقلوب ناسيات الحنانه

وتريد قوم تطلع على قوم..وتخش سوق نار اوقدانه

مقبوض عملته صدر واعزوم ..عاللى ايقول نا خو افلانه

ونجع ضابحه وين ما ايزوم.. ايجيب من بعيد انقرانه

ضبح صادى الحس منغوم.. طراقيع حس اضباحنه

حمام فج من بير امغموم.. سبق غامين احرصانه

ايجوها على كل مكروم.. مع امه امكمل اسنانه

حولين ما هوش مفطوم ..كبر امعاه تغضيب جانه

له ثلاث خرفان مجلوم ..رباع عنصلة كشتوانه

يجالب كما موج ديموم ..مساره اوقات اضولانه

على صفحته دق شيلوم.. ايشيل م الوطاه اخثقانه

لذيذ فى القدم حلو مقيوم.. شبعان م الذهب بالوزانه

واحلاس تونسى لقط مرقوم.. تفصيل ندو جادن امزانه

غزير النصا كوت مكعوم.. متخالبه نباتت اجنانه

بعيد م الوطا شبهة الكوم ..رفيع شوف ناقص اقيانه

خضر لون يزراق بحموم.. دخان نو ثابن غصانه

وعالشوكه بعد صار مذموم.. خماس قبل سن اقرحانه

ذراع نمر تلقاه مرشوم.. ايبدل لبوسة الوانه

وانصارن طراريد والموم.. وكل قنو ورا بيانه

عليه فارسن يقدع القوم.. ان زاف قرنها بالوذانه

بوشاحتين واحلاط ملضوم.. وافخر سلاح م الجبخانه

منين خمله بقرن مسموم..وافجعه فارسه بالخيانه

ايتم طارفه فى السما ايحوم..من قو غيض جبد الوحانه

وايجى الدير بالنص مقعوم.. ويقند صرايم اعنانه

وعلى كل مرفوعة السوم.. امغير الكفل واسعدانه

اتعطى راسه وانت مغيوم.. اتقول عود من خيزرانه

وتحجرها على جال ديموم ..وتخشك لسوق السخانه

واتغطس على راسه تعوم.. اتجى اتقول حوتة جرانه

دون رمشة العين ما اتروم.. اللى لك عليه الضغانه

وان غيبها راى مسموم ..اوقول العرب خش ذانه

واطمع بكسبها دايم الدوم..وايريد كل حد فى مكانه

يبقى احسين م العرف معدوم ..قليل ذهن ماله فطانه.

 

 

وردا على جواب الشيخ نصر بو عتكله شيخ مشايخ الحسون قال الشيخ خالد ارميله على لسان قبيلة المغاربه :

 

 

عللك جاينا يا نصر بالقيس والحكر.. لا فيه زود اولا نقص انقصان

لقبناه ياسر فى التفاصيل منتشر.. حطيناه ع الشاطار فى الميزان

او لطشت واجد كيف عوام البحر.. عتب نصيب والباقى علل عدوان

سلامك وصل مقبول ع الراس.. والظهر سلام عكس مو سلام أمان

جميع ما ذكر لسنك قريناه وانجهر.. اقرى جهر مو للسر فى الميدان

فكرك تبدل كيف موحت فى الخطر.. اتدير فى افحولتها معيز او ظان

اوفينا تخوف خوف تطويح عالنشر.. واتريدنا ابقولك نرهقوا ارهقان

واحنا اسباع برقه طبلنا وين ينتقر.. مثيله رعد يرزم اتجيه امزان

على كل تيغيا من الغيض والضجر.. ايصرخ كما المخطوف مالزبنان

على طول عمره ما نظر حالة الكدر ..علوق الشتا خلف براسه جان

الديره ايرف الصرع عالحال ينزور.. او هو فى اخيار الغيض و الجبدان

مساره ايجلول كيف لقاط الحجر .. ايضكضك نصيب او ينقلب اسوعان

ونحنا اسيدها برقه قديمين فى الدهر.. او مخرجين منها كم اصفوف اوطان

او كمين صف جاينا ورد منكسر.. ولقينا مثيل العظم فى المعطان

وخذناها بجر ايديه مازال منقهر.. وكلنا مكاسبها او ما تنهان

وحاضر ابروحك وين ما زاف الكفر.. اللى لكافة المسلم عدو لديان

انتوا وطنكم املكوه م البر للبحر.. خذوه شورطه تسليم لافزان

ونحنا نشهروا ف الدين بالله وانتصر.. ولا انحل ملوانا الهم لا لان

حتى ظلمت ع الغرب لا نجم لا قمر.. ابغوثك اللى مبعوث م الرحمان

نحنا هم اللى جبناه من الزر والوعر.. عتيق سيفنا خذناه م الطليان

وحتى اسمه ورسمه هاللى بيه تفتخر.. لولا احرابنا ما تم صاحب شان

وقسنا بعضنا كنت عالحق مختصر.. على هذى ما حلك الها انسيان

منين جيشكم فالقصر جانا منحشر.. سقناكم بميه لا ثمد حسان

اوهو بينا قاطب كما قطبت المطر.. براد الشجاعه ساعت الزنان

اولخرين هم جدودك غير ما بيت تعتبر.. ولا بيت تعرف الحادث بما هو كان

ذباحة ارجال الله والدم ينصفر.. او حافظين العلم والقران

ارحومه او صالح هل التهويس والبطر.. اللى ما طغى اطغوانهم لانسان

اوتموا بعدها هم عشا الصيد فى القطر.. اوخليتوا رمايمهم بلا دفان

او عاد نقسموا فى مالكم قسم بالحفر.. اوعاد قسمنا مو طق بالعيدان

واليوم ننذروكم نين ما تبقى غرر.. لا نحرصوا لانا عرب خيان

ولا عندكم ننسوه لا فيه تنعذر.. بلا يوم داير فى السما عثان

تلقوه فى امبراكم كما حبت الصرر.. ان تحسبوا يبقى عليه ادفان

وانشدد ارباب الناس تلقاهم ضرر.. اعظام الهوايش سم للحيوان

شريف العمل والفال بو حس منشهر.. الحاكم صغير العمر فى لاسنان

وكالة خلاصه عند كمين من ذكر.. على كون ما ياخذ ارضا قعدان

الا من قالوا مات وانشاد الخبر.. اتقول العرب هذا خلاص اوبان

ماللى احلقه والزروق فى سلبت الستر.. او بيع الدقر والملف فى لوطان

وهذا عزوته كنت مجهول مالخبر.. اتجيه مالحاربى من حذا مابان

اوعواقير برقه هل التبين والعصر.. اومن الفارس اللى باسمه فلان افلان

اللى نق خالى الجال اعياطه نقر.. ايجن فى محاريقى اوفى كيطان

اوهذا عزوته يانصر وخاذة العكر.. اللى فرع عالى من اجذور غصان

اللى مالهم حاجة الا الجيب للفخر.. اللى خلاصهم يثنوه عالمديان

اللى جرحهم فى شبهة النقش فالحجر.. لا يسوس لا يغبر ابطول زمان

اوحجايج الرخا رطبات فى شبهة الوبر.. ويكسرن بعدها فمت السيقان

واتجيك ساعتك فى الغرب وايجيكك الكدر.. اوتزرق كما زرقت جرد عصمان

اوتلقاه مسح فى برقه بعد كافة الخبر.. سلف حجايجك بايت على لامان

وان ما جيتنا ناتوك كون على حذر.. والوعد بينا قصر العقار اعلان

خالد ارميله فى الفخر بقبيلته :

حنا قبل حرفتنا على ايام الهنا.. منازيلنا فى لارض حافى سريرها

بوادى شوامس نرتعوا طارف العفا.. على جرة القناص رايد شكيرها

وفى نجعنا مازال لاذان والقرا.. بالدرس وكلام الله والع فقيرها

ووين ماخطف بارق سحابات م السما ..وفصل نباتاته مثل ناير حريرها

بطوال الذرى عوج العراقيب من ورا ..نزالين دار العلو فى اقبال خيرها

اللى مراحها فى الصقع فى وان الشتا ..مهاوش رتم بالمسك فوح عطيرها

والوحده بعد يطلب ولدها وتطلبه.. وتبقى تنوع له بعالى جقيرها

وتبقى تهاجى كيف هجاية الرحى اتدور.. على سياق النوم ساعة قذيرها

وتبقى عاد زرقاها كما نجمة الغرا.. كما من كشف ع الملف كاطا حسيرها

والحمرا كما الفوه كما لقط فى الكسا..مغاثة حجامة دم جامد قطيرها

وفى الشقرا عتاتى سود من غاية الفلا.. دوارا نصب قدام جارح نقيرها

ناقتنا ان طال المد تنزاد فى الخطا.. تروح بوافى الكيل قدام عيرها

سفرها يسجل لارض ميزان فى الهوا..رياسة القفول معاه ناصب خبيرها

وان جا غزى قاصدها وغزاى م العدا..وتمن مبادى اللعب بادى قصيرها

حنا حقنا نعطوه حاضر بلا بط.. وين يقدحن نيرانها من ذكيرها

وتمت تحشد من هناك او من هنا..نوارين شاطت فى فرايك خذيرها

وكم عيلا من هفوة المسك ينغشى شبعان ..م العصر ع الكبد طاوى ضميرها

ما قدر على السرقه ولا عيشة الردى.. ولا قدر على صنعة رجالا اتعيرها

راح فى سبايب جر مشهورة البلا ..خذنه جرايرها وقطعة صفيرها

وعدت اكحيلة عنف باسماح الوتا ..وجمالها مع الغالب تزعنف هديرها

وطاعت بلا شده على حكم سيدها.. جبار الخواطر يوم ضيقة حظيرها

وجبنا الما والملح والدهر والخطا.. لناسا سعادى روس ماهم حقيرها

عشرانا معاهم تم ع العز والبه..وصون المواجع من كبيرها وصغيرها

حبهم ملكنا ملك فى العرق للثرى.. فطمنا على الصاحب ونسى عشيرها

كلتهم على سبق مطابيق ع الحشا ..كلتهم مخضب كيف ريشة بريرها

وكلتهن اشرب من بيت فى وان العشا.. وكلتهن على مخلاه يصبح شعيرها

وكلتهن عليه احلاس تلاقيط بالنقا.. وكلتهن على طرحه مقلم شفيرها

وكلتهم موقر شيخ مرفوع النبا..هيبه البرقه من لجانب وغيرها

وها الشى كله مو ع البال مكثره لولا.. امواجعه فى القلب نقح سطيرها

تحشمت منها مثل قناعة النسا ..ونا لمثلها قداع لاكبر كبيرها

لانى خزز من وجه يرقد ع الوطا..ولا يهفنى بالعيب صاحب نزيرها

وراى النزاله عوده ودبره بلا وقا.. واللى مى فرس بوك لا عد تسيرها