رائعة الشاعر عمر بو عوينه ..... سبحانه

 ..  ..  ..  ..  .. *

♦سبحانه اللي وطنا تم خالي  ..  ما فيه والي  ..  الدايم الله يا مناة المتالي

 

♦سبحانه اللي تم خالي خرابه  ..  مناة الرغابه  ..  بعد مال ميال سايب شرابه  ..  في عالي الموج شيلوا أصحابه  ..   وفاتوا الغالي  ..  يا ريتهم كيفنا جو جوالي

 

♦سبحانه اللي سفروا في البحور  ..   نواجع حضور  ..   راحن طشاشات بين البرور  ..  خيوب ع الدهر خاين غرور  ..   وما من ليالي  ..   هنيات راعوا علي بوالعلالي

 

♦سبحانه اللي سفروا في البروه  ..   خلي نين بوّى  ..   مرباهم اصحاب العنا والمروّه  ..  من عند لطراف لعند حوه  ..   كانن نزالي  ..   فيهن عشا رايجات النعالي

 

♦سبحانه اللي تم خالي وسايب  ..   مربى الحبايب  ..   بعد عزهم فيه راحوا ذهايب  ..  غربهم تسفي عْراض الجنايب  ..   ان زام القلالي  ..   تشالى مشالاة كنها قْبالي

 

♦سبحانه اللي قبل مو للتعدي  ..   للغرب ودي  ..   علي قول من قال حاله تْكدّي  ..  ما نخست عندهم من مْجدي  ..   مْوكر وفالي  ..   وما ونست دير قوره عوالي

 

♦سبحانه اللي سفروا م السقايف  ..   اسياد العطايف  ..   الدايم الله يا ذرا كل خايف  ..  سيقوا مكاتيف سوق الوصايف  ..   بْعسكر ايطالي  ..   ما دافعوا دون نقر الشمالي

 

♦سبحانه اللي سفروا م الشلاق  ..   وصح الفراق  ..   وواجد اللي راه غارق غراق  ..  ويا هل ترى ويش حالة رواق؟  ..   ركاب الجبالي  ..   القاسي بلا كذب يوم القتالي

 

♦سبحانه اللي من مرابيه ثور ..   خيره مْجوّر  ..   لا تنجرب ناقته  لا تخور  ..   ان جت راده في ولدها تْدَوّر  ..   بزقره  توالي  ..   تلقاه منسطح كيف جدي الغزالي

 

♦سبحانه اللي سفروا للغروب  ..   اسياد الكسوب  ..   اللي ثديها كيف نزل الشبوب  ..  ظهيره لهلها سنين الكروب  ..   الواسع الخالي  ..   تجي رغوته زايده ع الجوالي    

 

♦سبحانه اللي سفروا في السفاين ..   أسياد المهاين ..   في وطنهم ما لهم نشر باين  ..  مطراهم يجيب الكدا والغباين ..   ولا لهم الوالي   ..    وزالن ايام الهنا والدلالي