الشاعر احمد رميله الفاخرى

 وين ما نريد انجيها .. نهاب جيتي لدارهم وماهم فيها.. اعزاز باعدو

وين ما علي ايبانن ..منازل بوادي قبل فيهن كانن
نواجع اسماح امكردسات ادّانن .. عندي العين يضّايق سما ماقيها
تذّكر وجوه أصحاب ما ينهانن ..يبقوا تقول ما غابوا نهار عليها
غرايره انكان شافوا ضروفه شانن .. نزيلهم امنين جاهم يجي ماليها

وين ما نهار نعدي .. لدارهم وهي خاليه نجي متكدي
ما تقول حقت نجع داير سدّي ..اذواده يجيبك من بعيد زفيها

الطّارف اللي ماله دروب اتودّي ..هلها يخبروه امنين جا بدريها
للخالي اللي فيه الغزال امجدّي ..معاليه نوّار العفا كاسيها

وين ما نجي لجباها ..دار بو احداجه عالكتوف سفاها
انطوّل ونا قاعد نحوس احذاها ..وهي له مدايد منتهي ذاريها
ياما ادّانن هنا بين اعلاها ..الدايم الله أيبالها وشويها
حكينا علي ناس الزمان فناها ..وحنا اسنينّا مسّع كمل باقيها

وين ما نجي لجباهن ..اديار بو جدايل عالكتوف سفاهن
نقعد نقول ونا نحوس احذاهن ..الدنيا امفيت الله من واليها
وين هل اقصور بادن وقاض ابناهن ..عليهن ارسوم فيهن بدع ناشيها
اوّين هل نجوع كانن شهير نباهن ..اوّين الصحابا والرسول نبيها

وين ما نجيهن جايل ...ديار نجع بوسالف سفاه جدايل
وهو له مدايد من جباهن شايل ..مسافه كبيره لاورا نمشيها
ورا زول دونه وقت ماضي حايل ..وحالت اسباب اخرى وما نبّيها
ونا راه قبلي كم واحد قايل ..اللي فالحياه اتسيرلك تحكيها

وين ما انجيهن طارب ..ديارهم انعاود من جفاهن هارب
القيته بعد لولاف سوقي خارب ..طيلة أيام العمر ولياليها
وسامع وناظر فألحياه تجارب ..ادّور عاليمين وعاليسار ارحيها
دروب خيرها ان راضت ايديرن سارب ..ونكان برّمت تاخذ اللي اتعطيها

وين ما نجي زايرها ..ايبانن مواير بيش نذّكرها
منازل هذيك اللي نظيف بشرها ..اللي قبل كان العقل والع بيها
احزام من اتنال الفوز يوم ندرها ..ان فاجت يجي داير وجيج نصيها
تجّوشن امنين قرن الركاب طقرها ..تعجب الناظر عند شيل ايديها
غريب وصفّا سابق متين ظهرها ..اموالف علي جيب الفخر راعيها

وين ما نجي زاير منازل هلها ..ونا كنت ناسي سيسبان عللها
اخطور من اسّفن عالكتوف خجلها ..يكثر ونمشي علتّي كام

ستين سنه بين عقابها و أولها .. مرن و عدن يا شقا قاريها