مازلت نا هو نا
الشاعر ضو ربيع الحامدي
مازلت نا هو نا .. ومازلت يازوزام كيف أنا
مازلت زي زمان .. يوم الوغى راكب علي الطربان
وأنشد عليا الترك والطليان .. إينبوك عل عقد الاجواد أعداء
عربي سليمي نسبة العربان .. سليل مجد زيد الخليل والفلحاء
قداش جايب بطل من فرسان .. مشاهير صنعوا في لبرورا ثناء
ولازلت حاتم طي والريان .. لانفرق الحايل من العشراء
كريم في بيوتي دايمة الضيفان .. في الرأس والا قبل في تيماء
شرقي المدينة وفي جبل غزوان .. مازلت عربي من قديم سواء
ومازال جدي صخر في الوديان .. ونحفظ مراثي جدتي الخنساء
صخر الندى ركاب عاالشعنان .. ومعاوية بالسيف في البطحاء
إيني من هزم الروم واليونان .. إيني منو هد اعروش للخلفاء
إيني من خطم زي السهم فالبطنان .. إيني من نشر لاسلام في الصحراء
ومازلت يا زوزام يا سنان .. شديد عالزمان انقول ديمه لا
وما انطيع غير الواحد الرحمان .. ومانركع الا ليه كل صلاة
ومازال تاريخي نظيف إيبان .. يحكي علي لاجواد والعظماء
اللي نارهم في رقابها ميزان .. في ليسار معروفات في البيداء
اللي عقدهم مايحكمه سلطان .. فيه قرسياني حار وين لفاء
مثيل الليوث يزدموا زدمان .. صهيل خيلهم معروف في لنباء
هفيف عقدهم والموت كيف الجان .. اليا جوك ما عندك اهروب خفاء ..
نعطيك من تاريخ في لاوطان
.. إينبيك ماضيهم اليوم مضاء
نقشوا في صدر الدهر في الوديان .. قدو الزراره قاعده لاسماء
وكتبوا بحرف الذهب كان وكان .. لايام تبني والدهور فناء
وقعدت اقصوري الشامخة شمخان .. كيف ما شمخ بلهول هو أنا
وكيف هرم خوفوا في لاثار بيان .. يضحك علي لألياش باستهزاء
ايني من اجذوري مضر بن عدنان .. ايني حرب بن وشاح بن بهثاء
بن عكرمة بن قيس بن عيلان .. بن مضر نا لازلت عل لاخطاء
ايني عقد ملس تعرفه العربان .. منين كان طبله ينق في الهيجاء
عرب واق عز البل والزغبان .. اولاد من تقفوا قبل راح ثراء
تحت القطف ميعادهم مابان
.. رد العقيله واردين الماء
قرب حو جايبهم قفل فزان .. فوق الحنونة شايلين غداء
صمتاتهم بي درها مليان .. إيدر من أمات اشمال فيه صفاء
اصقوره جوارح حايمه حومان .. مازال يوقد نجمهم ما طفاء
في برداي في فايا قد الصوان .. ضربوا قدا الخرطوم والبتراء
شالوا رسالة جيل في لزمان .. لهيب نارهم في الغرب في شرقاء
فوق من ظهور الخيل في لفتان .. وتعرف مشارب نارهم الانواء
وكل جيل سلم جيل بالنعتان .. اسياد الودوده والودود دواء
يعزوا الفرس والبندقه والضان .. وبيت الشعر والشعر والشعراء
ليست هناك تعليقات:
إرسال تعليق