الشاعر/عامر عبدالعزيز شيت

البل عمار المواعيد   .. و البل سبايب زعلها

اياماً و كانت تفيد   .. الا اليوم واجد هملها

تريد عزم و تر يد و تريد .. شوامس ايفكوا وحلها

ان صار دونها لطش تكميد .. وصار قول ريضك او خلها

و صارن عليها تجاريد .. موش كل نفس تحملها

هلها ايجوها جراريد .. اسباب عزها في عكلها

علي خيل تحلف طراريد وراها حذايف انعلها

معاها ولد زين .. عارف دواعي اسبلها

امربّى ولد سيد من سيد ..  احماية مضاوي حجلها

بنداق دقرته دوم في ليد .. بها معتني ما جهلها

كما صقر مونته صيد .. ما من قتيله قتلها

باللي احذاه من غير تفقيد .. ما من طريده ختلها

أوتاه صنعته موش تلميد .. سمحه عباته جدلها

ايدير العقال و القيد .. او عارف قليعة اشملها

حاسب حساب التناقيد .. عليها امعلّق اشملها

معاها امعزّب وحيد .. و لا أرضي بحاجة بدلها

سوقه لها غير تسنيد .. لاهي بطت لا عجلها

ابجاوي و عزمه شديد .. بها كل صيبه اوصلها

رايه عليها سديد .. موش كل تمه نزلها

و ان صار قيض رايه حميد .. رتّب او نظّم رسلها

افراز دلوها في مقاليد .. لا قيود حلفه فتلها

انكان ركّها جيد في جيد ..  قليل من اقربها نشلها

او تصدر و ما جض من كيد .. لا سبّها لا نعلها

وديده معاها عديده .. حسن الرفق له هبلها

و انصار حرث فيها جبابيد.. كم جابده له عزلها

مي شي خويله جراريد .. وين راد جاها بهلها

حدود غايته كيف ما يريد .. حليب كسر يبري اعللها

و هي في المسارح تزيد .. سماحه ان قابل هللها

مرات تبقى عبابيد .. أمباسيط طاير كسلها

و مرات تحلف مقاييد .. قاطع ألواها جملها

ماهي من اللي تلاميد .. أمباريك طاير شكلها

رسمت علي سر تاليد .. منها و فيها فحلها

لها جيل لا جا امباجيد.. زايح او واخذ أولها

تحلف كراديس في عيد .. تعرض لقايد جملها

و الاّ خلايا عبابيد .. في قيض حايش نحلها

محاضين في وان تطريد .. دوب يفرزوا في عسلها

دوم خاليه مالتناقيد .. إيعجّب السامع عللها

انقنها كسوبة اجاويد  .. المولى كتابه شملها

و قال انظرولها بتمجيد.. في الكون آية جعلها

مي أمقلدّه شي تقاليد .. او لي من مصانع جهلها

أو لي كي كراهب حديد .. إيصدّن إيبيدن عجلها

او لا يكيدها شي و تكيد  .. و يكيد البنادم عملها

اتشيل كل شي و الكراميد .. و رجعه و حليمه و بلها

بواخر خلا تشق تقنيد..  أتخرّم مع كل جلها

ان شال نجعها وان تسقيد .. و سراب القوايل نقلها

عليها قريب البعيد .. أتخلّط مخاير أعملها

أو خلّك أن جت مالجريد  .. معابي فواكه نخلها

من كل طيب جديد .. ما من اللي في قبلها

إيفرشك و هو كان في كيد..  جار جار هلها أو هلها