رد الشاعر عبد السلام الحر الدرسي على قصيده يا بو الحر قريني

علي انجيبه.. عزاك في غلا مفقود ما نبطي به

الصاحب ان ضاقت يفتكر صاحيبه.. ونا خفت قولة صاحبي جافيني
ملامك ثقيل وعيب كيف انسيبه.. نوقف معاك بما تجيب يميني
وفقد الغوالي كاينه ومصيبه.. انشد مجرب موش بالتضنيني
بعدك زارني ياسك اللي تشكيبه.. وفارقت ناس فراقهم رازيني
وحتي وياسهم طايل وفيه الغيبه.. لا عند بكره خافين رعيني
ونرجع لقولك في حزام الديبه.. يالحر نا طالب عزاء عزيني
احسن عزاك في صابغ سواد رغيبه.. واعتبره عزا مقسوم بين اثنيني
عيون من يشلد في محاس طليبه.. شال كيف ما شالو اعزاز بديني
ولا حد يرايي لك بقولة سيبه.. سكب عليه وقول ياناسيني
و لاانسامحك تغلق ابواب سريبه.. مول الوشايح دايرات زنيني
ادقلج مع قصقالها واحكيبه.. وكل بيت يطريها عليه انبيني
كلامك ذهب ميزون في تركيبه.. نبقي امغفل كيف ما يرضيني
ولا عاد شاعر من جديد يجيبه.. لو نعجنو ستين في ستيني
وصغر لبنادم في عيون قريبه.. سوال حرج من ردي عليه اعفيني
قول الحقيقه تم فيه الغيبه.. هالوقت لو غابيك لو غابيني
يعاود لميلات الدهر تسبيبه.. فداك ما حصل واصبر وراس قريني
نا صاحبك نبكي بما تبكيبه.. امفيت لولي هدا طلب خاطيني
نوقف معاك بما الجيب يجيبه.. لو كان سبسي نقسموه اثنيني
ولا لك مطالب واجدات صعيبه.. ولانك امكثر كل يوم تجيني
ولا القل معاره.. صاد الصحابه والنبي وانصاره
الخالق وعوده خير للصباره.. وضامن ارزاق الحوت في الغليني
كريم اطلبه ضامن غنا الفقاره ..وقول يالله رامي عليك اعفيني
عبدك ضعيف وحايسات أفكاره.. خلاص م المتاعب خدت ما يكفيني
بجاه الرسول اللي عزيز مزاره.. انجو من جوار الحسن والحسيني