■ اليوم اكبرت وعظمي لان .. وعيبي بان .. هضاك اللي متواري كان

 

■■اليوم اكبرت وعظمي كاخ .. وفكري داخ .. وصارن في وطني لمساخ .. اوجاع وجوع وشين مناخ .. وشاخ اللي ما عمره ما شاخ .. اللي لعيان .. شماوي خلاهم طشّان .. ابطلنا من طاخ وكرماخ .. ومالتعبان .. اللي ما ينفع فيه احسان .. اسمعنا كم اقطاف وفاخ .. .. وكم اعلان .. ردي ما يرضى بيه انسان

 

■■■اليوم اكبرت وقولي راح .. وسوقه طاح .. وحق اللي فالق لصباح .. امنلّي ما خلّو مطراح .. بلا نيران .. امتدن طالن كل مكان .. الساكت شال اتراب وناح .. بعد لحزان .. اللي صارن في هالزمان .. انريدو من يبو لصلاح .. اصحاب الشان .. ايقولوا هايا مهما كان .. .. قعدنا بين خشوم اسلاح .. .. وبين افتان .. افلان امصبي ضد افلان .. القينا ليبيين أملاح .. الهم وجدان .. يباتوا فاطراف السيسان .. الشعب الليبي خاض وذاح .. ابقي جيعان .. وجوعه طّول فات الوان.. النفط ابقي ما فيه ارباح .. .. الا دخان .. .. ودخله عند اوحود ابدان .. اتعبنا ضيم سنين اكلاح .. خلق بهتان .. ايقوي في ميل الميزان .. المشكى لله الفتاح .. قوي لركان.. الحي الجبار الرحمن

 

■■■■اليوم اكبرت وهن هاذين .. اقبال العين .. .. اهناك اوجاع وخلو ايدين .. قباله خلّن بو عقلين .. .. ايدور حفان .. .. ويمشي زقطيطي عريان .. عقاب رفقنا تما شين .. رفق رُهبان .. الحادر والراقي غلطان .. حشاك ابقينا ممتلصين

امعا طابان .. قديم ايفسّد في لوطان .. وجود الخير امعاه ظنين .. كما طوفان .. دمار ايخلّي في بلدان .. الله ايلم الليبيين

علي ديوان .. الصلح ويبقى فيه ضمان .. اسّاع ايعيشوا مرتاحين .. هنا وآمان .. ايطول الطارف والجيران ..

 

الشاعر احمد ارميله الفاخري