♦راس بيت♦

♦تنجير الخلال ورقع هلي بايد .. خير من فواهق كل يوم بزايد♦

 

♦ (ملحمة الخلال) ♦

♦رد الشاعر عبدالحميد بن دلة الورفلي♦

 

تنجير الخلال ورقع هلي بايد .. خير من فواهق كل يوم بزايد
رقع البياد وضربه .. وشدت الجابر في حفير الكربه
وين ما بدى زعنافهن من غربه .. وبانن اقنافاته اتقوا صمايد
شدو المقادم وابرمو عالمربه .. ابليف الطناب وم الحديد وتايد
راي ساهله العيطه السوق الخربه .. الا الواعره حزة السوق الكايد
تنجير الخلال ووجهته وتقاته .. وتقلة ارواق البيت واسناحاته
 ولا اتقولها غزر السحايب فاته .. راه شومهن مازال فينه ايصايد
وقعّد احداك الوني زيد تباته .. وحط ماعليه اتخاف فوق سدايد
بيش التهنه ابسكنته وشناته .. وبيش في أظلاله ننعمو برغايد

 

 

♦ (ملحمة الخلال) ♦

♦ رد الشاعر سليمان بوخضرة البرعصي♦

 

تنجير الخلال و طقا .. وسد الفواهق فيه خير اتحقا
وابرم على اللي فيه بايد شقا .. وكرب ارمامه ما يبوج مايد
اجبر اثنين و لربعه تتقا .. وشقة طريقه فارقه الزوايد
امفرش ابحلفه حيه مية نقا .. اجواد اللب طيبك اصحاب عوايد
ايحطوا الحق و ياخذوا في حقا .. ويردوا اللي حايك عليه مكايد
دونه مصابي صف واحد تلقا .. واحد و تلقاهم اعزوم شدايد
خير مناله .. لو كان تبقوله ابليس نعاله
الفاهق اللي يطلق ايجيه اخلاله .. واللي بايدة تنشال خير وعايد
اتبن فالغرارة عزتا و دلاله .. وتعود شكوته تسقي الضيف ودايد
وينسوا اللي فايت مشى في حاله .. ولا يكون كلتم لناره كايد
وينسوا اللي فايت مشى في حاله .. ولا يكون كلتم لناره قايد
لاجل أمانة للجيال ماله .. لا تورثوهم شي فيه غدايد
اتمومج وعامر يا الله برجاله .. انظاف اانوايا للجروح ضمايد
تنجير الخلال ورقع هلي بايد .. خير من افواهق كل يوم بزايد

♦ (ملحمة الخلال) ♦

♦ رد الشاعر عبدالسلام ارحيم الحسناوي♦

تنجير الخلال ورقع هلي بايد .. خير من فواهق كل يوم بزايد
الخير بناسه .. البيت بوكمام وعزوته وحرّاسه
ايحاموه م البايع وم السنداسه .. وراثين جودة هل اعزوم شدايد
كان هو تكاصا ياشقا الخمّاسه .. الجابر ويصبح للزوال السايد
لازم وواجب يفزعو الترّاسه .. ايطقو اخلالاته بلاش مكايد
حمل الجماعه ريش ع اللي قاسه .. ابصفو النوايا مو عليهم كايد
توحيد صفهم غالي لمع نبراسه .. وتصفى نواياهم إلهم افوايد
على قلب واحد تنجلى التعاسه .. على غوش ساده حزن لود اللايد
جرر الطمع في جاه فيه محاسه .. صارت وفقد ارواح تحت لحايد
ومامن جوالي ذاهبه منهاسه .. زينقو سقفها والغطا ابجرايد
 ردوا لشرع الله يا ريّاسه .. غفور ورحيم ان كان عبده عايد
واحنا جميعنا معني ابرد انفاسه .. قبل الآوان ايفوت وانت امحايد

 

 

♦ (ملحمة الخلال) ♦

 ♦رد الشاعر محمد عمار شهوب♦

لموا الشمل .. وكونوا جماعه ترفعوه الحمل
بالصبر بجتهادكم بالعمل .. بالصلح موطنكم يولي رايد
وبيه توصلوا يا خوت شط الامل .. من وسط الغريق اللي ظلامه سايد
وينبت نبات اخضر يغطي الرمل .. و بعد الجذب يحضر الغيث بدايد
تربحوا تتهنوا .. كان صلحكم شوره اكل تدنوا
وتطووا اجروح اقلوب منها ايأنوا .. لم شملكم ليها يكون ضمايد
راه وطنكم في دفع نوضوا ونوا .. عليه سيل من كل النواحي لايد
شتاتكم عجب زمرات ما ينعنوا .. الطامع برز فيهم وهوا القايد
تنجير الخلال ورقع خيط البايد خير .. خير من فواهق كل يوم بزايد
هيا بلا تأخير وانتوا اتهنوا .. اعلان صلحكم خلوا ف كل جرايد
وراكم اجيال ف صلحكم يستنوا .. عليكم بنوا حلم النجاح الشايد
طق لخلال ورقع هللي بايد .. خير من افواهق كل يوم بزايد

 

 

 

♦ (ملحمة الخلال) ♦

 ♦رد الشاعر توفيق الغيزاف الدرسي♦

البيت وثاق .. عدلة ارمامه والدفاء برواقه
ما اتريد تنفع قسمته بطقاقه .. وسرد الحسايف فوق حيط نضايد
اترج المثابت كثرة الدقاقه .. سطيرهن علي جازل البيت ايكايد
إيهقل البيت وتلحقه نفداقه .. ويبقى مع ريح الخريف إيمايد
اخياط الرقيع وشكمة الفوهاقه .. إيريدن إيدين امحسرات عضايد
وبرمة كبير ابسطرسه ولباقه .. ايهندب وهو صاحب الراي السايد
لكن الدنيا جايرة فراقه .. جابت اسنين اموسمات شدايد ..
ابقي رزق طير ابذارنا و ازراقه .. وشاخو علي كوف الطمير لمايد
وجدت علينا فالعقاب صفاقه .. وشهدن علي قطعة الروس جرايد
ابقينا انهابو شكعة البراقه .. واحنا فالفراسة صاحبين عوايد
ملسوع العدامة عندنا ترياقه .. كنا وكنا للجروح ضمايد
امغير الطمع فينا خذا غنداقة .. اعقول عامرة تمن امغير صمايد
ورايحين بين الدبك والبنداقة .. علي حرب مافيها إلقاط حصايد
ماعندنا فيها .. جمل ﻻ ناقه .. امغير نار واتخلف النار رمايد
يلهد عدونا في فرس محماقه .. ونحنا علي فضلة اخيول قعايد
واليوم كل حد فينا طلق مزراقه .. ابقينا بعد جار الزمان .. .طرايد
تنجير الخلال ورقع هلي بايد .. خير من افواهق كل يوم بزايد

 

♦ (ملحمة الخلال) ♦

♦رد الشاعر عبد الله امبيوة الزنتاني♦

تنجير الخلال ورقع هلي بايد .. خير من افواهق كل يوم بزايد
نجر الخله .. وترقيع بايد م الجوانب كله
يسكر فواهق جايبات العله .. ويدرق مواجع واجدة وغدايد
وراه خير من شرقي بريح يقله .. وراه خير من فتنة ونصيب مكايد
وراه خير من مشكل ويصعب حله .. اللي فات مات وهك ربي رايد
نرقعهو بخرقة .. نلموا بعضنا ننبذوها الفرقة
من غربي زاورة لا امساعد شرقا .. لا عند سبها الخوتنا الزوايد
لا حد غرباوي ولا من برقة .. وماعد شي تسمع بليبي عايد
احنا بلادنا فيها شواطي زرقا .. واحنا بلادنا فيها الخير بزايد

♦ (ملحمة الخلال) ♦

 ♦رد الشاعر سليمان علي البوزيدي♦

تنجير الخلال ورقع هلي بايد .. . خير من فواهق كل يوم بزايد
خلوا القلوب نقيه .. .ﻻ موجعة ﻻ احقاد ﻻ كيديه
يكفي تشظي وقصص مأساويه .. ضاق حالنا والهم بينا ﻻيد
لمته الضغاين بيننا والسيه .. ولمته هتايا والدموع بدايد
ولمته الخو في الوطن يقتل خيه .. والدم سايل سيل ليه مدايد
ولمته فحال الوهن والسلبيه .. ولمته بمجد اجدودنا نزايد
 ولمته يعيش الورد دون اميه .. والجرح ما يلقاش ليه ضمايد
واحنا مناهج دينا الوسطيه .. مانا طوايف ﻻ ملل ﻻ عقائد
خودوا بنهج رسول اﻻنسانيه .. اللي بحكمته حنن قلوب شدايد
منح يوم مكة العفو والحريه .. لم شمل لا في صيد لا في صايد
هاتوا ايديكم يا عربنا هيا .. خلوا خطاب الصلح هو اللي سايد
ليبيا وطننا وبيتنا جمليه .. نتصالحوا نردوا احباب ودايد
فيكم عشمنا يا ضنا البيتيه .. ربة عصر ليكم اسماح عوايد
نريدوا همة .. رجاجيل تفزع شمل وطن تلمه
نبوا وطننا شامخ عزيز مسمى .. وطن خير في صنع الحضارة رايد
يكفي انقسام وشهدرة ومذمة .. خراب راينا في جرة نصيب شوايد
وما من اللي لا واجعه لا يهمه .. يعد في مصاب الناس ليه فوايد
لسوق الطمع ساري وسافي كمه .. لمكسابه ناصب حفر ومصايد
العادي طمع فينا وزرع سمه .. شبابات وار ينا فوسط لحايد
نشر فتن بين الخال والابن وعمه .. صبح حالنا حالة بلاء ونكايد
والوطن حازاته هموم وغمة .. وبابا العويلة في معاشه كايد
وما من اللي مفقود عانت أمه .. لا ليل ترقد لا تروم وسايد
والقلوب ما لانت عصية صمة .. وفي الغل نلنا مرتبة و شهايد
سوالتكم بالذاريات وعم .. للوطن كونوا مرحمة وسنايد
ما يدوم حال ولا تدوم ملمة .. كلام قايل في ابيات ضمن قصايد

 

♦ (ملحمة الخلال) ♦

♦رد الشاعرة فاطمة مفتاح بن اعموم♦

تنجير الخلال ورقع هلي بايد .. خير من فواهق كل يوم بزايد
 تهليع الفواهق علة .. والصلح غير من زيد الكلام وقلة
وللي انهلع ساهل علينا خله .. مادام لينا في القلوب ودايد
وحمل الجمل مانغلبوا في قله .. والعزوم راهن من زمان شدايد
والصلح لاهو دنقره لا ذله .. هو خير من تدبير هالمكايد
 رقع الفواهق خير .. وشدة الجابر مانهار تضير
للي فات مات وردته ماتصير .. دفناه ونحطوا عليه لحايد
وطن وتشظى خيرنا للغير .. سابحين في تيار سوه عايد
قواريب الموت كبيرنا وصغير .. والموت فينا لاعبه بالزايد
حق وواجب .. سوا ماعجب واللا ان تما عاجب
هذا وطننا نحطوه فوق الحاجب .. وننسوا مشاكل مالهاش فوايد ..

 

 

 

♦ (ملحمة الخلال) ♦

♦رد الشاعر رابح بوخبينة♦

تنجيرة الخلال وطقتا بالمره .. فالفاهق الي ذكراه تمت مره
لرواق بيت من هول الزمان امفره .. قباله ويطلق في ارياح صهايد
وترقيعة البايد موش باب مضره .. بالعكس را فيها نصيب افوايد
يتعب الدوارين قص الجره .. وحنا شعب له مبدأ وليه عوايد
واضحين كيف الشمس ما انتوره .. ولا حد علينا فالوجود ايزايد
ضنا ليبيا مانا ضراري ضره .. اجواد من اجواد ونركبو الجوايد
والي صار كله سو ضاهر بره .. بإذن الكريم وتنتها الشدايد
ونعيشو طرابه في هنا ومسره .. وننظم علي وطن الأمجاد قصايد
تنجيرة الخلال وطقتا نبوها .. وترقيعة البايد خير لو ترضوها
ليش ما جميع احقادنا ننسوها .. الي هن صنيعة كيد كل امكايد
بيش من جديد ابلادنا نبنوها .. ونقضو علي وضع الخراب السايد
وانتم ضناها مالغثر نقوها .. ولقطو سواياها القاط حصايد
من جرح ينزف كادها داووها .. فيدكم دواها قربو الضمايد
تنجير الخلال وطقتا فرواقه .. وحطت الحيط اتزيد فيه وثاقه
 تحميه من عواصف ريحن صعفاقه .. ايخلن الجابر عالوطاه قنايد
والبيت كان ركنا طاح ما يتاقا .. ولا عاد يعجب من جديد الرايد
ايباتو ضناه امشردين زماقا .. هناهم عليه امردعين لحايد
زواق العلل فينا خضا غنداقا .. امحصل علي شقة الصف شهايد
ومازال يطرح للخراب اوراقه .. ومازال ينصب فدروب مصايد
انكان ما وقفناله ايزيد اقناقه .. ونبقو شماوي فالبلاد طرايد
تنجير الخلال و رقع خيط البايد .. خير من افواهق كل يوم بزايد

 

 

♦ (ملحمة الخلال) ♦

♦رد الشاعر عبدالباسط عبدالنبي اغنيه♦

 

تنجير الاخلله .. راهو خير ونقولو اسم الله
 الرقع الحال واللي ضاع خله .. غير العبر ما منه فوايد
 وطن وطاح يبغي من يقله .. ما يبيش حايد لا نحايد
يبي يدين ممدوده تقله .. ال برا فيه الامان ايتصايد
 يبي قلوب من غصة العله .. تبحر بيه ل شط السعايد
 يبغي عزم فالظلمه يدله .. بيش تعود نيرانه وقايد
 يبي نفوس تصفى بيش حله .. تلهى بيه وتزول الغدايد
يبي راي والراي يتجله .. من ما قال ربي بالوكايد
 من ما جاب محمد وخله .. بيش ما يضيع من جد وجدايد
قد ما صام الابنادم وصلى .. عليه سلام طباب الافوايد
تنجير الخلال وطقتا فالبايد .. خير من افواهق كل يوم بزايد
تنجيره ضروره .. المن بالوطن متولهن شعوره
 وعنده عقل واعي للخطوره .. وعارف عمق جرحه والضمايد
 مدرك هول ما عكست الصوره .. من هالبيت واللي بيه جايد
 طب الوطن كي طبة الكوره .. بين اقدام من مليو مكايد
ليه زمان شوره موش شوره .. مو مرتاح من كتر الصهايد
فيه ان جبت مالخاطر وغوره .. وصف ال داه نحتاج ال جرايد
ما نوفيش وصفه لا نجوره .. ان قتلك حي ما بين اللحايد
هو محتاج لانفوسا صبوره .. ما ترتاب في فك النقايد
هو محتاج كل فلان دوره .. ياخد فيه بيش يعود سايد
هو محتاج لينا يا صقوره .. بيش يعود لدرب الرشايد
حتى ان صاف من بعد الخضوره .. تاني يعود كان الله رايد
تنجير الخلال ورقع هلي بايد .. .خير من افواهق كل يوم بزايد

 

 

 

 

♦ (ملحمة الخلال) ♦

 ♦رد الشاعر عزالدين العكاري العمامي♦

الفايت رده .. موحال حتى لو قصير المده
ابنادم ان جي للصلح فاتح يده .. مالعيب تعزيره دفنقي زايد
و الاجواد ديما للملام اتعده .. مالوقت الاول وارثين عوايد
الا اليوم داهش لين واصل حده .. نفسنا وضاق الخشم بين وسايد
ماتقول من اسلاف اللي كبار الشده .. عصارة وحطوا عالبطون وسايد
اصحاب الكباره يكبروا لابده .. وديما اسناح الجود ليه رفايد
شوامس و هل رافه اصحاب موده .. و ايحسوا رقيق الحال موش بلايد
بيه يكبروا لا يطيح لا يجده .. بلاسم ايحطوا عالجروح ضمايد
وان جاهم الغازي يوقفوله سده .. هل وطن ماهم جايين لمايد
اصحاب المروة عادين العده .. على شرع ربي مايهابوا كايد
 تنجير الخلال و رقع هلي بايد .. خير من فواهق كل يوم بزايد

 

 

♦ (ملحمة الخلال) ♦

♦رد الشاعر عبدالسلام سلامة الرياحي♦

هاللي بادن .. فيه خير الفواهق علينا زادن
ومن كل صيبة هي المصيبة لادن .. وعام الجذب بكري بريحه جايد
تعالو لراي الصلح ما يتعادن .. اريانا وفيه عدو لود اللايد
طامع وعارفهن انكان تنادن .. عقول ناسنا للصلح ماهو عايد
وكيد لبعضهن زاد هاللي كادن .. ردو لشرع الله شرعه سايد
وختام العلل عن دربهن ما حادن .. الحق نور ما والي عليه ايزايد
وباطل و حق الزوز ما يتحادن .. ولا بينهن ينفع انسان ايحايد
تنجير الخلال ورقع هاللي بايد .. خير من افواهق كل يوم بزايد

♦ (ملحمة الخلال) ♦

 ♦رد الشاعر عبدالعاطي اغنية الورفلي♦

تنجير الخلال ورقع هلي بايد .. خير من افواهق كل يوم بزايد
زاد الفاهق .. خلا اللي مستور واهق واهق
ماعاد كالشاهين شاهق شاهق .. حايد حيوط الحظ مشية محايد
الزوم سونا فالبير زاهق زاهق … نرجع انجدد للاجيال مجايد
و اللي اعلي بالصوت ناهق ناهق ..  ما يهمنا واحنا اسباع شدايد
اسباع طبعنا للمجد طاهق طاهق .. انكيدوا اللي عالوطن دار مكايد
يمسي مثيل اغراب ماهق ماهق .. منبوذ حتى من عيون الصايد 

 زاد عوجنا .. و زاد زادنا هالزاد ما عالجنا
من بعد فج الظلم فيه ولجنا .. صار حالنا ما بين صيد و صايد
بالوحل رايات السلام مزجنا .. بالكحل كحلنا قلوب قلايد
اللي قبل كلمة سلمهم منهجنا .. عن نهج الكلام اليوم هاهي تحايد
لا صلح لا الإصلاح ليه عرجنا .. الباين كلام الليل كان جرايد
ارخص ثمنا فعيون من خرجنا .. وزاد صب فوق كبودنا المكايد
بعنا اعقار الجد ليه احتجنا .. و اللي سبق غز النبق بالزايد
اركبنا قوارب موتنا موجنا ..عاقدين في جنة الغير عقايد
شربنا المرار مرار لين مرجنا .. واللي طلع مالدار قدره حايد
الزوم نرجعوا لي دينا يبهجنا .. خوت والخوايا عهد سايد سايد
و الطير مهما ايطير عن مدرجنا .. نقطة نهاية سطر عايد عايد

زاد فسِنَّه .. الفاهق اكبر وسَنْ لينا سُنّه
المفروض كل واحد يعض بسِنّه .. علي كل فرصه مأكده بوكايد
 ننسوا اسنين عجاف مرن مِنّه .. من غير مِنّه زايده ومصايد
شبعت الأرض قبور يعني كنه .. هالموت غير قلوبنا يصايد
شوفوا عراق العز  كيف كونَّه .. لحروب ما خلن أعياد تعايد
شوفوه ورد الشام سئلوا عنه .. ليه العطور الزاكيات زهايد
وليه يمننا الغالي تشبع غُنّه .. وبدل الحياه حنت عليه لحايد
الذنب ذنب الساكتين لأنه .. الساكت علي لحقوق حقه كايد
الزوم كل ابلادنا تهنى .. وتشفى جروح الروح دون ضمايد
لاشرق لا في غرب.. فيه محنه .. خوت والخوايا عهد ربك رايد
وعلي قولت الجسمي ليبيا يا جنه .. وعلي جنتي كاتب اليوم قصايد