♥ ما يغركم♥

♥ما يغركم تبديل بعض احواله .. كذاب غبر ما سيب اللى فى باله

 

♥ما يغركم بالطرفة .. ولا تفرحوا، نيته عليكم حرفة

يجهر لكم فى قبر عالي جرفه .. منقرش حواشية غريق الجالة

جواب المحبة ينعرف من ظرفه.. وماضي التجارب دل ع المقبالة

جواب المحبة ينعرف عنوانه .. ولا هيش فخرة هدته لسجانه

ما عمرهن ملين الا ف زمانه.. وشوق ما طري فيهن على رجالة

وان كان اشتهاهن وين هي الضمانة.. اللي تصوقروا بيها ثبات احواله

♥ما يغركمش بوده .. ولا تحلموا بمباسطة ومودة

صيوره يهيض وينقلب ف العدة .. ويبرطع عليكم كيف ما يحلى له

موال منطرن خرافته ممتدة .. ان كانكم رضيتم بيه شينك حالة

موال منطرن يا مشينك خرافة ..ولا كان هود تحسبوها رافة

مغير وين ع الخالى خبط مندافه ..وب >ين عوار الدوم عقب افعاله

بدى جر ناعم منخضع يتغافى ..يبحبح عليكم بحبحه عجالة

منخضع فى جره .. تواضع لكم يختل رخى ها المرة

خالي قضية دار يده برا .. زعميتهن اوجاع الوطن مان افعاله

مبورع متاع طروح فعله ورى .. فساد نفس سودا حاقدة سافالة

 

♥ما يغركم بالروقة  ..ولا هناك صابة كاذبات بروقه

مفيت غير قبلي ما هوى صندوقه ..يشفشف صهاديكم عجاج رماله

مذبل ربيع الوطن مخلي بوقه.. مودر زهاه وسمعته وامواله

امواله ضاعت..والوطن سمعته بارخص اثمان انباعت

والكبد درهت م الصغاير ماعت..وثقلت حمول الجور ع الحمالة

وضاقت علينا لارض باللي ساعت..ورحنا ذهايب للصغا قبالة

واللي قبل طفيت هاي تو استاعت..نار فتن تقدي باقصة شعالة

 

♥ما يغركم بغراير..ولاو ربح مكسب من وراه خساير

لكم سنين ما ريتم مفيت قهاير..وقلة كرامة ومرمدة ورزالة

اركاس ليف مثلث عليكم داير..خناق ع البلاعم خاشنات حباله

لبلاد غرزت ما عاد فيه دراير..يبس ضرعها يشخب دما شتالة

شاخب دمه..غزير منفلت تيار فاتح فمه

استاسع على الضماد صاعب لمّه..شقى في معاناته غلب قنداله

دواه الجراحة هي برايد  سمه..ان كان هو لقي دكتور رايق باله

 

♥ما يغركم باسعاده..ولا تحسبوها فيشطة منعادة

خماس منطلق ما قرعه ملهاده..عصا ع الصرايم شريده نعاله

حافر شكل موبار حبل قياده..له فتل يربط لو صدف فتاله

له فتل يمسك لو صدف ولاّمه..رعاة خيل تطبع باللجم لمامة

فراسين كسر يقشعوه غمامه..جيابة ثنا للموجعة  حمالة

يروق شراب البير للغنامة..ويصفن بناتيله اللي وحاله

 

♥ما يغركم بسكاته..ولا تمتسح من وطننا سياته

واخذ رضا الشيطان في حضراته..ما يوجعه ديما طوع لاقواله

مغرور ممتلي بالكبر عاشق ذاته..منفوخ غطرسة ساقط متاع رزالة

عجيب امرها كيف الوطا حملاته..وهو عند روحه داسها بقباله

وكيف تقبل تراب..وطننا دوسة عفاه مذبل

خرب مساديه وغزلهخبل ..ويبس عروقه ودره باله

طّلق لجان مكلبة تسبل..بزور ع الخلايق داعسة شتالة

 

♥ما يغركم بطروحه..ولا تحسبوهن دايمات فروحه

ما حلهن برين وساع جروحه..ولا مريضكم حله نسي ساواله

طاح ساسكم قابل وطا مطروحة..احكام عهد ظالم حركن زلزاله

معزول وطنكم كافش اليوم بروحه..منعاف م الدول ممنوع ع الجوالة

وطنكم فى عزلة..وفي كل يوم بفالطة ناقز له

عابي على المكروه ومجهز له..خوازيق يا اللى غركم برواله

يخطط مصير الشعب ويتقز له.. ولا عمرها جت سيق له فاوالة

 

♥ما يغركم بالسبلة..ولا تامنوا راهو مدرق حبلة

بيديركم ميراث وتى شبله..بشراكم ولاية عهد هانيباله

اللي صحيح واجعنى ومستغرب له.. كيف ترتجوا م الفاسقين عدالة

وكيف تطمعوا بمحنة..عليل جوف ما ترجوا شفاقة منه

يهز في لجاوينه بعد كادنه..تنتيف ريشهن جا من سعدكم حاله

دعي ممتلي باوهام ما يخطنه..خوي غدر واضح ما يعوز دلالة

اللي يسمعه يحساب عنده جنه..واللي يوصله يشويه في ملاله

سنين فقر جدابات بيه رزنا..ويفرج علينا ربنا بزواله

 

♥ما يغركم تطويقه..ولا تحسبوا ربي هداه حقيقة

ركوبه لبلدوزر مع تمزيقه..قوايم الممنوعين ضحك قبالة

مغير وين ما نوبز وجا للضيقة..وكثرن صناديق التريس ترا له

يهديكم تريس الكوز فى تفريقه.. ويبرك عليها لصها من ياله

يهديكم تريس الكوز وين يمشكي.. دار البطيط وهاو منه يشكي

يا ليبيا ، يا يام ، طال عطشكي.. حذا البير ذودك منعمي رساله

بلا يوم يمسح كل ما يوحشكي.. ما تربحي لا لك نما مندالة

 

♥ما يغركم بالنخوة..ولا تامنوا لفعة رتم يا لخوة

ان كانكم غبيتم بيه ، بيكم يخوى.. وينكر الخاين كلمته واقواله

شوفوا الماضي كان فيه الرخوة.. القابل عسل باللوز للوكالة

شوفوا الماضي كان فيه رطابة ..لكم حق ف الفرحة وهي كذابة

ثوروا عليه وسكروه حسابه.. راهي الشجاعة صنعة الرجالة

واجهوه ما ترضوا بظل ركابه.. مغير ضعف منكم قوته مذبالة

 

♥ما يغركم بالساهل.. ولا تحسبوه اهمال غير يماهل

ماو للعدم وطني ولا يستاهل.. دولة قلال الدين والزوبالة

ولا يحكمه بالزور واحد جاهل.. لو الشعب واعي ما تغيب عدالة

لو عرفوها.. غرسة عدالة كورجوا غرسوها

لو كان هذا ما ذابوا اللي فاتوها.. ولا من حصل طبل مع الطبالة

يداوروا في الشمس لو حايوها ..راي تو ملفى للعرب ظلاله

تتقى لهيب القيظ كان غزوها ..غازيين يلقوها صحيح عدالة

 

♥وما يغركم تطمانوا.. ولا يجركم بالهيدقة تليانوا

محابيسكم هاذول ياما عانوا.. بلا ذنوب داروهن ولا بطالة

وان كانكم نسيتوا ذل ناس اانوا.. ويش ظنكم في اللي شنق بحباله

ويش ظنكم في الغايب.. وشن قولكم للوالدة والشايب

ديمة بيوت حلال موش مصايب.. وتحريش النسا ع الفسق ماي سفالة

لو يجيب من قتل بغير سبايب ..ما نقبلوها توبته ختالة

ولا نقبلوا له توبة.. ولا نسامحوا ، ولاهن خفاف ذنوبه

ثروة غزيرة ضايعة منهوبة ..راحت على التخريب والقتالة

وخص ع المواطن قوت هو مطلوبه ..لا عاد شاقه لبس لا كامالة

وغبيت طريق الشرع مي مدروبة..طبوق ريح حجرها على الرحالة

 

♥ما يغركم بالبسمة ..ولا تطمعوا باللين راهي رسمة

صيور ذيبكم يقلب يعاود لاسمه..ويدغر عليكم كان جاه ظلاله

يسلط عليكم ميط ياخذ قسمه.. وذايقينهن ظني سنين دلاله

ذايقينهن ظني سنين المحنة.. ولا يوم فكره جاب ما يفرحنا

تحطيم قيدنا واجب علينا نحنا ..ان كان دينا لاسلام يا رجالة

لنا في كتاب الله ما يشرحنا.. ما بات مؤمن من رضي بطالة

كتاب الهادي.. يوجب علينا رد ظلم البادي

وان كان مغير آيات ع السقادي.. ورومة الهانة ورفقة التنبالة

يا قعادنا ما بين جاى وغادى.. نعاج خايفة من ذيبها جفّالة

تاريخنا ثورات م الأجدادي.. ونحنا علينا حمل له شيالة

 

♥ما يغركم بالطيبة.. حنش منطوي ناوي علي تنييبة

يعفس لكم في عفاس سم يجيبه ..لكم في قصاع وبالفواح الدالة

ان كان وطنكم خارب، سبب تخريبه.. اللي اليوم يومي ع الخراب بشاله

انكان وطنكم خارب اسباب الخربة ..مد الرقاب وخوفكم م الحربة

شلة ظلال مزينت له دربه ..كلاب دم تنبح للعوج فعالة

رفيقة الجربة بالضرورة جربة.. لها الطلي يطلوها عرب موالة

رفيقة الجربة تعدي والضيم انتفخ يا ليبيا مستعدي

يعمك الله بشبوب به تنسعدي  مة ضناوينك اللي عوالة

لاسبد وانتي خايفة ترتعدي..يجي لك فزعهم ناغرين زعالة

يحيدن غشايش هن سبايب بعدي.. ويصفى حساب ، ويخلصوا سواله

 

♥ما يغركم تنغروا.. ورا حلم وردي ينسجه تنجروا

سيناريو مفضوح غير تمروا ..مشاهد اخراجه ، تكشفوا مواله

ان كان تدمنوا صيوركم تنضروا.. وينال جايزة من دمكم مّثاله

مّثاله ينال جوايز ..وسكاتكم ع الفسق ما هو جايز

الفكر المقاوم له سنود ركايز.. واول شروطه رفضكم لاقواله

ان كان الدعي بيت رضاكم حايز.. لا تلوموا ع الوقت لا ع الحالة

 

♥ما يغركم م الباطن.. كذاب له حجايج يرفعن ويواطن

ثريت لك حقوق وقدر يا لمواطن.. يا فرحتك قربع الحبر غسالة

كون منتبه يا شعب حذري فاطن.. ولا تنخدع باوهام من هوالة

قريب ينتزح قاطور ها المعاطن.. ويكمل الزيت ويسحبوا عماله

هباتكم ع الظالمين تباطن.. راو وقت، نوضوا للجهاد عجالة

هباتكم ع الظالمين تراخن ..وسمطن سبلكم ع الجهاد وباخن

فايطات يصالن عليكم شاخن ..وين الشهامة ونخوة الرجالة

جذور نبتكم ف ارض الكرامة خاخن.. وجب قلعهن سخساخ له  حمالة

 

♥ما يغركم بوثايق.. ولا بزور يفخر تدمغه الحقايق

من يوم جاه ووطنا مضايق ..ضاعن حقوقه ورايحة العدالة

مرتع اوباش مشيطين حرايق .."أكلامه" عليه حصار بالبدالة

لا هناك رافة ، لا هناك شفايق ..غابة بلا قانون للحوثالة

 

تمت غابة ..ولا نفس حرة ، لا هناك نقابة

تنكس علام العز طاح تكابى ..وطنا شلايك بيدن سدوالة

كنيب يجردن له من خيار شبابه.. سرايا يعلن سنزقه وهلاله

يجنه يقضن شايشات طرابى.. يدكّن حصون الدجل ع الدجالة

 

♥ما يغركم ترطابوا ..ولا كيف ما فصل عليكم تابوا

وليش بالنفاق يشحشحوا يزابوا ..شيابين شرف يرطزوا حجالة

الواهب الرزق الله شن تحسابوا ..هناك رب غيره ترتجوا ف افضاله

راكم اصحاب الحق هي اصابوا ..وردوه صاع اللي طغى بامثاله

 

ردوا صاعه ب لطّة.. قوية قاشعة وجاعة

منضام وطنكم جرد طلب فزاعة ..عليكم عبى عاقد كبير آماله

ان كان فرض موت استشهدوا بشجاعة ..خير م المعيشة تحت م السفتالة

وان كان نصر بشراكم هلل لاطلاعه.. قريب فتح مولاي الكريم تعالى