قصيدة الأحرف العربية

هذه القصيدة للشاعر عبد السلام عطية الناعوت القطعاني من منطقة البطنان تناول فيها الحروف الأبجدية العربية حسب ترتيبها

♦ حرف أليف

 أومن بالكريم وطوعه .. ونفسك انهاها ع الخطا وتبوعه

طيع المولى .. في أمره ونهيـه لا تخالف قوله

وأمشي على درب الحبيب رسوله  .. اللِّي مكانته بين العرب مرفوعه

صلاه وسلام المصطفى نهدولـه .. هو وأهل بيته كافَّةً مجموعه

♦ حرف الباء

 بيَّنهن .. ربِّي فروضه في الكتاب أعلنهن

افروضه الخمسه قيمهن واحسنهن .. ولا تخشّ بكراعك اطرق ممنوعه

ومن قبل جنحاته تحطّ ثمنهن .. جواد الهوى عنَّه ومِتّ اصروعه

♦ حرف التاء

توب لربَّكْ .. ونفسك الأمَّاره اصحى تلعبَّك

واقبل مرارة نصيحته اللِّي يحبَّك .. ميش بالنفاق مغلَّفه مخدوعه

واللِّي بلَّغك بالسبِّ كي من سبَّك .. إِنْ طعته وجرَّك جِيْتْ للطبُّوعه

♦ حرف الثاء

 ثمِّر إِنْ جيت تخرِّف .. وخلَّك علي الباطل بعيد مطرِّف

الصادقه بها ديما لسانك شرَّف .. صاحب الصوادق كلمته مسموعه

والصادقه كي صرف الذهب تصرَّف .. وهي لبّ جوهر دينَّا وفروعه

 

♦ حرف الجيم

جود بمالك .. إنْ ريت ناس حالتم أضعف من حالك

وعوَّد علي الكسب الحلال اعيالك .. النفس الكريمه بالحلال قنوعه

ولا تغفل عن ربَّك بعون صفالك .. ولا رحمته تيِّس إن جاتك جوعه

♦ حرف الحاء

 حارب من عليك تعدَّى .. وطنك ودينك دونهن تصدَّى

اللِّي يمسِّهن بالشرّ ياجب ردَّه .. نين ع الخطا يندم يحتّ ادْموعه

ما من قوي صارع وطي مو مدَّه .. وفاز الضعيف بنسفته ورقوعه

♦ حرف الخاء 

خلَّك فاطن .. وقبل ظاهرك ياجب نظاف الباطن

وطن العروبه وأنت فيه مواطن .. وفي أرضه نميت وعشت بين ربوعه

ايدين العماله إنْ كان دونه حاطن .. من أجله تثور وثورتك مشروعه

♦ حرف الدال

 دير الهمَّه .. وخلِّيك متواضع وافي الذمَّه

عليش اتْغطّرس وانت روح ورمَّه .. وصيُّور روحك مِ الجسد منزوعه

واللِّي تطرطشه بكره يكيدك لمَّه .. في نهار لا شروه ولا مبيوعـه

♦ حرف الذال

 ذمّ الناس لا تشقى به .. ورافق اللِّي طاهر نظيــف جنابه

واكره المنحرفين والكذَّابه .. وخلِّي علاقاتك بهم مقطوعه

لنسان يتعلَّم من أفكار أصحابه .. ما هناك حرفه فِ اللبا مرضوعه

 

 

♦ حرف الراء

راس الخير هي المحنَّه .. وأصحى إنْ درت خير تفسَّده بِمَنَّه

فرض الكرامه يعود باكثر منَّه .. جميل إِنْ كانت غرسته مزروعه

وإن صاد غيرهم لا عاد تنشد عنَّه .. وما عند ربَّك تنتسى مصنوعه

 

♦ حرف الزين

 زوِّد بالعلوم أفكارك .. بيش يستفيد المستمع باخبارك

وخلَّك إمَّا تحكي فهيم ودارك .. وكي تقول كلمه قولها مردوعه

ميط مِ العلل يشرح جميع أسرارك .. وميط م العلل تافه حرام اطلوعه

 

♦ حرف السين

سال العارفين انشدهم .. وإن كانوا بعيد اتعب لهم واقصدهم

أهل الصلاح يوقَّضك مقعدهـم .. وإن جالسوك من غفلة ضلالك توعى

وإن جوك لمرض جهلك دواء تاجدهم .. كي جيَّة الترياق للملسوعه

♦ حرف الشين

شوف اذنوبك .. وإن درت الخطا عالج خطاك بصوبك

وقبلن تعيب الناس شوف عيوبك .. تلقى افواهق دايرات هلوعه

مِ العيب ضحكتك وأنتَ مشرِّط ثوبك .. علي شخص لابس ثوب فيه ارقوعه

♦ حرف الصاد

صون السرّ في مكنونك .. السرّ اجحده حتى على واشونك

وحتى ع اللِّي كونهم من كونك .. العاقل يموت السِّرّ بين ضلوعه

إن شاكيتبه صاحب تظن يصونك .. ملامك علي نفسك إن صار اذْيُوْعه

 

♦ حرف الضاد

ضدّ النفس دير ضميرك .. كي كرامتك قدِّر كرامة غيرك

وخلِّي الموت ملازمه تفكيرك .. الروح للمات مصيرها مدفوعه

اصحى تحرسك ذاهب بخطَّة سيرك .. إن ما درت صالح ما تجيك نفوعه

♦ حرف الطاء : طال العمر وإلاَّ قصَّر .. ليوم الرحوله في اوتاك تبصّر

وتوب ع الخطاء لا ع الخطا تجسَّر .. تلقى غفور ورحمته موسوعه

العاقل إنْ خشَّ معا طريق مكسَّر .. معا جرَّته ياجب عليه رجوعه

 

 

♦ حرف الضاد : ضبط النفس في مطلبها .. غنيمه إن شاخ العقل نين غلبها

وإن شاخت عليه وللهوى سيَّبها .. مريضه بلذعات الخطا مليوعه

نفس البنادم إنْ كان ما طبَّبها .. ما بروحها تبرى وهي ميجوعه

 

 

♦ حرف العين : ع المعاصي حوّد .. بغير الفضيله لا بشي تعوّد

وعلي قدّ ما تقدر بعلم ازوَّد .. وبدينك تحصَّن واثقات دروعه

الرائد ابروحه كي الوطن يروِّد .. منازل العفا فيهن يحطّ انجوعه

♦ حرف الغين : غافر كلّ ذنب وزلَّه .. رحيم توبته تاسع العالم كلَّه

شرعه طريق وواسعه منحلَّه .. تنجِّي المومن من أسباب ضْيوعه

رَحْ شوره واطلب العون من الله .. يعينك بحسن عبادته وخشوعه

♦ حرف الفاء

 فاتحلك ادروب كثيره .. واجد انظاف وواجدات خطيره

تخيَّر ودير اللِّي اليوم تديره .. اقلاده علي عنقك تجي مدلوعه

الخير صاحبه بكره يفوز بخيره .. ولاخر ضريع الهاويه مرتوعه

♦ حرف القاف

 قيم الدين وادِّي فرضه .. واحفظ حقوق الجار واستر عرضه

بربَّك تعلَّق ياك عنك يرضى .. اللِّي به تعلَّق ما يخاف وقوعه

من أجل العمار استخلفك فوق أرضه .. موش للفساد وعوكره وميوعه

♦ حرف الكاف

 كلّ شدَّه تتَّليها راحه .. وباب الفرج الصبر له مفتاحه

المومن بها يضمن أسباب نجاحه .. حكمه قديمه في الكتب مطبوعه

امجرّباتها قبلك عقول نصاحه .. مي للتجارب جادَّه مبدوعه

♦ حرف اللام

 لومك له يعود ندامه .. .. اللِّي تبَّع إبليس وخشّ في برَّامه

مسّع تجيه لومة اللِّي لامه .. عقليته بما يكره الله مشبوعه

امراكبي يراعي في الخطر قدَّامه .. اموجِّه مع عكس النجاه اقلوعه

♦ حرف الميم

 مي مذهوبه .. وعليك بطريق الحقّ هي المصوبه

والباطله إن صادرها الحق غلوبه .. مصيرها امعاه إن صارعت مصروعه

مهما الآيه تنعكس مقلوبه .. ما الحقّ للباطل يسير خضوعه

♦ حرف النون

ناصر خوك ساعة كدره .. وجلِّي عليه الهمّ واشرح صدره

إِنْ كان فيه قول وفعل زايد قدره .. المومن يهمّ يفعل اللِّي في نوعه

ما ينفعن هيكل الثلب وهدره .. بحمله إن ما خاطر عَ المقطوعه

♦ حرف الهاء

 همَّك وانشراحك فيده .. اطلب المولى ولا تسال عبيده

بفضله تطول اللِّي عليك بعيده .. وتقهر اللِّي عنده عليك دشوعه

والمسلم إن ما تمَّا قوي العقيده .. ما في صلاته فايده ورْكوعه

♦ حرف الواو

وَجِّه للصلاح فوادك .. وربِّي علي الشرع الشريف أولادك

بهم تستفيده وتستفاد ابلادك .. الفرد بصلاحه يصلح المجموعه

وفكِّر شويّ إن ما كلامي صادك .. وإن ريتني اخطيت الخاطيه مرجوعه

♦ حرف لام أليف

لا ترضى لمسلم خونه .. وإن قلت قول وفِّي به وعهدك صونه

حتى أولدك ما منَّه تجيك معونه .. وهو في ضلال وبلعطه وميوعه

وما ينجني زيتون مـن زيتونه .. وهي م الوطا بجذورها مقلوعه

 

 

♦ حرف الياء

 يعاقب ويرحم ربَّنا سبحانه .. وهو أحكم الحكَّام معظم شانه

وهو اللِّي بعد تطلبه يجيك حنانه .. حتى لبومعاصي رحمته مطموعه

ولكن يحاسب كلّ حدّ وإيمانه .. نهاراً تجي المغطِّيه مقشوعه

♦ الهمزة

همزت لكلِّ حرف بنصّه .. وآنك اسمعت الديّ حصَّه حصَّه

نقِّي مخايره ولآخر قصَّه .. إن ريت صايبه في خاطيه ملطوعه

المرّ تدفلَه لكن الحلو تمصّه .. واللِّي تمضغه يسهل عليك بلوعه

وصلُّوا ع اللِّي بالعداله وصَّى .. ويوم بعثنا لنا عليه شفوعه