رد الشاعر جمعه بوخبينه على فصيدة للشاعر مهدي بشير التمامي

فيه المهاجي هاجا...خذا العلو لاعد العشم لا راجا...رحيل قسمهم
***************
عزم عالشيله...وهاجا المهاجي في عقاب رحيله
قسم الغوالي غير مالي حيله...والجرح وين ما يكبر صعيب اعلاجا
ونا زاد جرحي ماعطاني قيله...امنقد عليه ادقول صاحب حاجا
عليك وانت غابي بين يوم وليله...اللي اتقول ما تشقا ابها اتفاجا

*****
فيه المهاجي نابا...وين زدم عالشيل لف عقابا
رحيل قسمهم جبا ونا في بابا...انمامي عليه ودمعتي قجاجه
يبقا نصيب الغير ما نحسابه...نين فاهقه نسمر امعا وجاجا
ابقيت كما من فاقد حنان حبابا...عليه وين ما هفو نصبت اطباجا

*****
فيه المهاجي قذر...وقال اقعدو فالدار مو متعذر
لا تعرفه ناضر وفي ايحذر...ولا تعرفه شامت وفيه مراجا
ونا ابقيت مالصدمه ادقول امخذر...اللي البنج ناخذ فيه من بناجا
العمر كمل والدمع فيه انبذر...كيف البحر يقوي دليف امواجا

*****
رحل من داره...وهاجا لمهاجي فيه نين تواره
رحيل قسمهم ونا اشربت امراره...بعد امهاوده صعبن علي ابراجا
اخساره بعدها ما اهناك اخساره...ادردر اللي ما عمر ضاق ملاجا
يا بال من كيفي وطا في ناره...وداجيت فيه غير ما يداجا

*****
وين تكفا...رحيل قسمهم هاجا عليه ولفا
سواق غبر اموالف هذيك الدفا...ياما مشا فيها وياما قاجا
واللي قابله مشوار جا يشفا...طرا قوت شال فيه حجاجا
نوارت العفا منك الياس قطفا...وكاس المر اسقاك من مجماجا

*****
برم ريته...وهاجا لمهاجي وين صدر نيته
فيه وجريت وراه ما طقيته...جنح جنحت الدشاع وان اهواجا
شال وبتل والريح متكفيته...واللي بينا صارت لها نعوجا
نكذب عليك انكان قلت انسيته...والا فيه طامع بعد هالمراجا

الشاعر مهدي بشير التمامي ......

رحيل القدم فيه المهاجي هاجا.. خذا العلو لا عد العشم لا راجا
*****

خذا المعلا..وهاجا المهاجي فيه حسه علا
بعيد ساق لا عد العشم لا ولا..طريق جفو مقطوعة رجا وامراجا
وكمو العلايل باب كدر وعلة..بين الحشا لاعب زنيف امواجه
ايهايي قعد للعقل وايخايله..ينساه وقت ويناوض علي طهباجة
وراه دار لا تنطاق لا اتخلا..وما كيف تدكار الغوالي حاجة
*****

 الرحيل اسقم..اتلهلط كراميده ابتاته رقم
وابهت في املاصفة السراب تلقم..ملظوم لظم بواجة ورا بواجة
حاتمينهن الاقسام منه عقم..هذا الراي لو باتن علي نتاجة
م المر والمواجع يجرعن الملقم..قانعات غير الكبد ما تداجة.
*****
 مد وساقن..رحلانه علي حد السراب تلاقن
اتقول حلم نايم خلع منه فاقن..بلا امواعدة بيه المفاجي فاجا
صدعات فايتات ا لعزم ما يتاقن..ولاو عاد لاقي حيل ع المداجا
اقبالة هوادي والخفا ماراقن..وايجي الليل وايحوسن مع مجامجة
*****
 برم هاوينا..شيعت عيني فيه واطا عينه
القسم هو اللي جا غر غرر بينا..مشا اسكات لا ندهة ولا هاراجة
وانحلن فجاوي بعد بيني وبينه..وعر وطن موحش ما قطاوي لاجا
وجانا عليه قصيد من بوخبينه..داواه بالدوا خير م العلاج اعلاجا
فحل زنز قوله دق من ماكينة..ثمين بيه بتنا ع الاخرين خواجا
*****
 سرا ايتماشا..وسواقة اطرافة ع الهجا شواشة
كلاه موح في وسط السراب تلاشا..ادليم وراه العقل في وجاجة
والدار مريبة تفهق ولا طشاشة..وارياحها علي خلو الخلا خجخاجة
اسكاتها ايخوف موحشة غباشة..لو كان ماي مربا كبد ما اتناجا
*****
 اسربط طايب..خذا العلو لا عد العشم لاو هايب
الياس قابله غايب ملاقي غايب..ودار دون منه قور سود حجاجه
والدنيا اتوري كل يوم غرايب.. وادروبها ان طالن عندهن نعواجة
وما يشد في الايام غير الخايب..والا عقل مدمدر ارياه مراجة
*****
 المهاجي حسه..يجثمر علي طوله اتقول اموصا
يجاوب معاه العقل لاقط غصة..يداو دوي غارق العب بامواجه
واللي ما تلذع بالهوا لا مسه..هذين عند عقله تفرجة فراجة
واللي ضاق حر الفقد واكد حسه..الجرح وين يستاعر علي العالاجا
ومهناك عقل وماو واخذ حصه..غير كل حد له فاهقه واملاجا
والعقل كادني دورد علي وعصا..وامقاني اخويط الرجو بين انساجة
قامر عليه الياس قصة قصة..وجابنا علي خلو الاوهام حراجة
*****

هذاك يوم ماو كيف العجاج عجاجة.. اقلام الاقدار بما جرا
 المهاطي هاطا..خذا العلو شوّاطة ورا شوّاطة
ينفخ وراه السفو دار غطاطه خطاطة..جميع ما اكتب للحي فوق حجاجة
تخلاق من هذيك وهو العقل اوناطة..تراخن وتمن خاربات امزاجة
حواحية الرحيل وهرجته واعياطه..لها الوقت في وسطه لهن رجاجة
*****
 هاوينا ناقل..بشواش يدَّادا بحمله ثاقل
وهي حرها في الجوف صهد مناقل..اللي من جدامير الحطب هجهاجة
شيلة الرحيل اتخف عقل العاقل..يابال عين دوارة اسبل حراجة