ملحمه سبحان كيف هنتك و هونتينى 

يقال ان مطلع القصيدة بيت قديم رواه السيد سيف النصرعبد الجليل

سبحانه اللى هنتك و هونتينى ** نسيتك بعد ولعات و نسيتينى

.. .. .. .. .. .. .. .. .. .. ..

الشاعر المرحوم محمد السيفاط

.. .. .. .. .. .. .. .. .. .. ..

سبحانه اللى شاظينا

وهانيًو هنته سمح شبة عينه

يا طول ع الجظر فى عز سهرينا

وان ما جيتها تهلب عند و تجينى

واليوم كى صار الخراب ابقينا

متجاورين لا نزلف ولا تطرينى

متجاورين جيره مره

اسباب الخطى فى الشعر ما اتوارى

نصيب صار هو راضيه و مرضينى

قسمات الغلا كانن سبايب جرًه

وصار الخطى منى ومو طانينى

الشاعر الشريف السعيطى

*****************

سبحان كيف توازى

غلانا الله مفهوم فى مركازه

نا كنت شورك نغلب الحزازه

وانتى تعاندى الحساد و تراضينى

سبحان من ايهون العزيز اعزازه

ويفوت يوم لا نطريك ولا تطرينى

سبحان كيف تغير

والياس فى غلانا لا بطا لا مير

يا ما جرى ريدى و يا ديًر

واليوم شايف كيف الزمان تغير 

نجى انصادرة بالوجه ما يعطينى

ما بيدى حيله

المكتوب ما نقدر على تبديله 

سبجان اللى غًير احوال آصيله

كانت حتى ع الصلاه تلينى

قساميك شظن ما لهن تعديله

اصًعب قربنا و حارم عليك اتجينى

سبحان ديمه دايم 

ولا من اندفن بعد الممات يلايم

خطرها على خزرة عيون الحايم

الياس بينا حودد ودار قسائم

باحكام ظلم لا ترضيك ولا ترضينى

سبحان كى هنتينا

ونسيتك بطول الياس و نسيتينا

حسود الغلا منظًر ضاقت عينه

وصار الخطا و الياس م الاثنينى

سبحان ما كتب مولاى فى تكوينه

اليوم ناكرك وانتى نكرتى دينى

الشاعر مصطفى اعبيد الهونى :

*********************

هنتى هانك تركتى 

تركتى ترك عقلى انسيت زمانك

اغليتى اغلىك فى العقل علا شانك 

رفعتى رفعتك فوق حاجب عينى

برمتى على ليش بعد احسانك 

خطا قبل ما نعرف او علمتينى

مازال فى ايدى ماسكه عنوانك 

اللى فيه واعدتى اوما جيتينى 

من يومها عندى نقص ميزانك 

الله ايسامحك فى ما مضى قيلينى

باللى جابت

برمتى برمنا والعقيده غابت

نفسى علييا لا اتلومى زابت 

برد الكفا واصل ترى خاطينى 

وان كانك نكرتى والعًدول اصًابت 

انجيب لك مضى يدك رهن فى دينى 

عندى عليك اشهود حقى ثابت 

عهد بيننا ما بيه وافيتينى

الشاعرمصطفى عبيد الهونى

هنتي هانك .. تركتي ترك عقلي نسيت زمانك

اغليتى اغليك العقل علا شانك .. رفعتي رفعتك فوق حاجب عيني

برمتي عليا ليش بعد احسانك .. خطا قبل مانعرف وعلمتيني

مازال فيدي ماسكة عنوانك .. اللي فيه واعدتي وماجيتيني

من يومها عندي نقص ميزانك .. الله يسامحك فيما مضى قيليني

بلي جابت .. برمتي برمنا والعقيدة غابت

نفسي عليا لاتلومي عابت.. برد الخطا واصل الخطا خاطيني

عندي عليك شهود حقي ثابت ..عهد بيننا مابيه وفيتيني

وان كانك نكرتي والعدالة صابت .. نجيبلك امضا يدك رهن في ديني

نسيت زمانك .. وقلبي مليته صبر درت مكانك

واجد تبعتك غرني شيطانك .. طرق قبل مانعرف لهن جبتيني

سيات درتي غالبات احسانك .. بشي بخس للي يكرهو بعتيني

ليش تخدعيني ياقليل امانك .. عطيتي اسراري للعدو خنتيني

ردي عليا بيني برهانك .. كاني نقصت معاك طول سنيني

لكن بعد ريت الجفا عنوانك .. الجافي عليه النفس ماترميني

شاعف وشعفني كلام لسانك .. تايب بعد حبك حلفت يميني

لانريد غيرك.....لانريد مكانك .. فضا خير قلبي ارتاح لاتشقيني

جميع ماطرالي من تعب في شانك .. حتى فمنام الليل ماتهنيني

وجربت والتجريب من نقصانك .. الياس شارته فوقك قبالة عيني

راضي بما قدر علي رحمانك .. نحنن حنين الواردة خليني

نسكت انكان فكرت وقت احسانك .. ونثور م السيات بعد تجيني

زايد وناقص ماثبت ميزانك .. تخبل علي الغزل لاتلوميني

الله يسامحك توا بنترك شانك .. اللي بيننا حزت نواطي عيني

نسيت غلاها .. ونسيت كل ماو صاير زمان معاها

علي وين ماتخطر نعد خطاها .. دوا هناك ماكيفه لها ينسيني

نافكرتي تعبر علي معناها .. اللي جربت في الماضيات سنيني

اللي كنت مانصبر نهار بلاها .. وهي زاد ماتصبر انغبت اتجيني

بعد برمن ليام وصار خطاها .. ماعاد نرضيها ولاترضيني

الشاعر معتوق ادم الرقعى

******************

سبحانه اللى هنتك وهوّنتينى 

وانسيتك بعد ولعات وانسيتينى

سبحان كيف قسمنا 

وبعد الغلا هو كيف صار خصمنا

وليش ف الفراق انتى ونا ساهمنا 

عليه نين لا لمتك ولا لمتينى

وليش نركنوا للياس نين حكمنا 

وهو كان ما يقدر حذاك ايجينى 

سبحان كيف انسيته 

زولك اللى فى خلق ما الساع ريته

قير شاربك ياطول ما مصّيته 

وذراعك بغير جميل وسدتينى

واليوم ناكرة ياحلوة التبهيته 

حتى لو طرونى فى علل تنفينى

سبحان كيف تحوّل 

غلانا اللى هو كسبنا فى لوّل

ربيعه زها واجد وخيره طوّل 

اياما وكانن مقبلات اسنينى

واليوم فيه ياسك بالخراب ايعوّل 

وصافن خضاراته قبالة عينى

سبحان كيف صبرتى 

وكيف يامرادى ع الخلاف اقدرتى

زمان فى سبيل ارضاى ياما درتى 

حتى للشروط الواعرات اتلينى

واليوم عن طريقك لوّله عوكرتى 

بلا عيب درته فيك عاديتيتنى

سبحان كيف انسيتك 

وهو كيف جانى صبر بين اخطيتك

ايام قبل ما نزهى الا فى بيتك 

نا حرك وانتى زاد ما تنهينى

واليوم عن سريب غلاى طارت نيتك 

وكى بضاعة اسرائيل قاطعتينى

سبحان كيف تلاشى 

غلانا وفيه الياس حط اوباشه

والقدر بينا تما امغير بشاشه 

ع الحال تبرمى حتى ان لاقيتينى

ما نحسبوه ايسير يادوداشة 

خطا بينا وانتى عليه اتعينى 

انسيت ايامك 

وابقى شطب فى دفتر غلاى كلامك

الياس قاطره ذوب عقاب غرامك 

اللى قبل جا بين الحياه وبينى

وزالت مهاياته جمال قوامك 

وهو قبل حتى ف المنام ايجينى

انسيت منابك 

وانتى زاد عن شورى قفلتى بابك

لا عاد تشقى بى ولا نشقى بك 

انتى دنقرى وانا نواطى عينى

حتى بيش نقّار الغلا يحسابك 

ما قبل ريتك يوم لا ريتينى 

انسيت سحر عيونك 

وانسيت كيف سبحانه لطافة لونك

حسّاد الغلا داروا دسايس دونك 

حتى نين جافيتك وجافيتينى

وعاد يطعنوا لى فى بياض اسنونك 

اللى قبل ما تزهى بغيره عينى

نسيت سريبك 

وناجد الساع نصيب كيف نصيبك

مخدوع كنت فى كثرة غلاك وطيبك 

بين الرجا والياس خليتينى

ووين ما قريت سطور فى تنسيبك 

نهيت خاطرى بطّل عليك حنينى

نسيت حقوقك 

وانتى زاد سكّرتى حساب طلوقك

اياما ومازال الغلا فى شوقك 

صرّاف خزنتك موحال يرفض دينى

واليوم شيك غياتى زطل فى سوقك 

وانتى عملتك ما عاد ماء تسقينى

انسيت لوعة نارك 

وقصّر على زرعى سحاب امطارك

ايام والغلا مصيون بين اقدارك 

انا انسال وانتى بالجواب اتجينى

واليوم وين منظارى اخطى منظارك 

ما عاد جيمك حل غامض سينى 

انسيت لفظ لسانك 

واخطيت كل درب ايشيلنى لمكانك

بعد صار باب النقص فى ميزانك 

خلّيه سرنا مدفون بينك بينى

وخللى اللى حاس اثمار جنانك 

ايحاحى على طيرى بعد يرعينى

انسيت شبّت عينك 

وانسيت كيف سبحانه جمال جبينك

البارى اللى حلاّك فى تكوينك 

على راد من كاس الخطا يسقينى

وابقيت وين مايطروا بهاك وزينك 

تسيل دمعتى متلاحقة من عينى

انسيت اوصافك 

ما تقول عمر العقل ساعة شافك

ولا عاد نسمر من اوجاع خلافك 

من يوما بجرعة ياس داويتينى

ارتاح خاطرى باولاف كيف اولافك 

ربى كريم لا شقّاك لا يشقينى

انسيت الغيّة 

وانسيت كل ما قالوه فيك وفيّا

على غلاك يازينه قريت الفيّه 

وبدمع فيه عزّيتك وعزّيتينى

واللى فات مات وتلزمه النسيّة 

من حاش فيه سامحتك وسامحتينى

انسيت دروبك 

وانسيت كيف تهميدة سواد هدوبك

زرع غيرنا جا فى محر اشبوبك 

ونا فى دفين اليبس خلليتينى

واجدين كيفى فى خفا ولعوا بك 

غير نا اللى بالصادقة هستينى

انسيت اخباره 

غلاك وغلاى اللى اليوم توارى

اياما وهو مازال توقد ناره 

حتى ان عبت ما بالعيب واخذتينى

واليوم وين ما ياسك اشربت مراره 

على شى ما ينقال عاتبتينى

انسيتك ديمه 

وارتاح خاطرى ياحلوة التبسيمه

وابقى النطق باسمك ع اللسان جريمة 

لا عذر منها لا رجاء يعفينى

محيت راه من عقلى وياه وميمه 

حتى للغزال ان قلت ريم اكوينى

انسيتك ديمه 

وارتاح خاطرى ياحلوة التبسيمة

وابقى النطق باسمك ع اللسان جريمة 

لا عذر منها لا رجاء يعفينى

اللى قبل ما عندى بلاه عزيمة 

نقراه كل وان بيسرتى وايمينى

ابقى اليوم لا ليّا ولا له قيمة 

زاطلين لا نشريه لا يشرينى

انسيت اخباره

غلاك غلاى اللى اليوم توارى

اياماًوهو مازال توقد ناره

حتى ان عبت ما بالعيب واخذتينى

و اليوم وين ما ياسك شربت مراره

على شئ ما ينقال واخذتينى

انسيتك ديمه

وارتاح خاطرى يا حلوه التبسيمه

وابقى النطق باسمك اللسان جريمه

لا عذر منها لا رجا يعفينى

محيت راه من عقلى وياه و ميمه

حتى للغزال ان قلت ريم اكوينى

انسيت وعودك 

ونسيت هدب ناعس فى بياض خدودك

ياما زرعتى ف الطريق ورودك 

وياما بجور غلاى شكيتينى

وياما امتر العقل من ميجودك 

وياما اسلاف الخير بادلتينى

وياما بذلتى فى رضاى جهودك 

وياما على ما درت جاريتينى

وياما مزارى كان هو مقصودك 

وياما على جظرات ناجيتينى

وياما كليت اثمار من عنقودك 

وياما ربيغك فيه راضت عينى

وياما غرستى غابتى من عودك 

وياما بغير اتعاب كافيتينى

وياما فديتى عملتى بنقودك 

وياما ضمنتى ف المصارف دينى

وياما حشدتى ف العناد حشودك 

وياما بلا حزّاز هادنتينى

وياما رسلتى بالسلام اوفودك 

وياما انكان اخطيت سامحتينى

وياما تحدّيتى كلام حسودك 

وياما ان صار خلاف طاوعتينى

وياما لقيت العدل بين بنودك 

وياما مرار الضيم قاسمتينى

وياما رعش قلبى رعيش نهودك 

وياما برمش هدوب طامنتينى

وياما اضّاون فى ذراى خدودك 

وياماسواد العين ناجا عينى

وياماصهد قلبى صهيد وقودك 

وياما بقير عفاك داويتينى

وياما تهايالى رنين عقودك 

وياما فصل بين المنام وبينى

وياما بسطنى فى الحديث جبودك 

وياما ان غبت عليك عاتبتينى

وياما سكبتى دمع فوق خدودك 

وياما بصوت حنون ناديتينى

وياما حرستى غابتى بجنودك 

وياما بلا ميعاد قابلتينى

وياما احتار الفكر فى جرعودك 

وياما ابقيتى لى ذرا يذرينى

وياما بلا رخصة وطيت حدودك 

وياما وياما صار واحملتينى

واليوم سيل سياتك وقصف رعودك 

مدينة غلاى هدمن ما عنتينى

ما كان ودّى للخلاف ايقودك 

كلام ناس لا يرضيك لا يرضينى

اللى قبل يسعوا فى فساد بنودك 

يا مخادعة فيهم اليوم اتعينى

ونا اللى صاعب على جحودك 

وحال غايتك من خاطرك تمحينى

تريد تطعنى ف القول بين شهودك 

وتريد تنكرى الاسناد عينك عينى

لكن ان دام وجودنا ووجودك 

اما نلين لك والا الساع اتلينى

دوبين ما حطوّا عليك لحودك 

كلام جد لا انخطاك لا اتخطينى

حتى لو بنيتى ف الطريف سدودك 

ما يفصلن بينك حدود وبينى

ان كان راجعن الايام لى ا تعودك 

ونا كيف ما كنّا وفى تلقينى

حتى لو ايديروا بالحديد قيودك 

انجيك كيف ما كان الغلا واتجينى

وبعون ربنا ناكل مخاير جودك 

وانحاكيك باللى صار واتحاكينى

الشاعر عبد الرحمن بونخيله

*******************

سبحان كيف برمتى

حسيبك الله ساس الرجا هدمًتى

ربيع الغلا صائف معاه ذبلتى

و ارياح القبالى صهدهن شاوينى

و ليام مالن و انت معاهن ملتى

جفيتى ** هجرتك انسيت و انسيتينى

سبحان بعد الًلامه

نسينا سهارى غيته و اوهامه

خسارة غلانا راح هو و ايامه

وبقى الصوب خرافة عرب تلهينى

و اللى قبل عمرى ما نطيق ملامه

ما عاد حتى فى المنام ايجينى

سبحان تم سريبه

حتى وين ما نطريه فيه الغيبه

كيف نجبده و بينى وبينه ريبه

وصوبه احرًم نازل عليه ايمينى

هللى معاى مذًابل وذارف عيبه

لو شاطنى ولا عاد يبينى

سبحان بعد الغيه

بقينا انعًدو فى الخطا و السًيه

تقول عمر ما عشنا ايام زهيًه

ولا عمر راضت فى ربيعك عينى

ويا طول ما جيتى تشاكى فيا

و اليوم ذايحه معاك دوخًتينى

يا طول ما دللتك

ويا طول ما شلت غلاك وشلتك

واليوم بوزعتى الغلا بوزعتك

انتى صامله وانا زاد صملاتينى

انت باديه بالعيب هنتى هانك

انت سالكه وانا امخًلص ديًنى

سبحان بعد الولفه 

ماعاد الخاطر غلاهم يلفى

ولا حساب باقى بينا لا كلفه

سيات باعدن بين العزيز و بينى

وضاع مالنا ما بين دين و سلفه

والياس طامع فى عقاب خزينى

سبحان كيف توارى 

غلا من قديم معاى تكبر ناره 

ابًعد وين ما بانن اوهام دياره

وناره هفًت وبقى الياس قرينى

ولا عاد كى يلفى انقول ايساره

ولا ان جيت ضامى م العطش يروينى

الشاعر ابوبكر آدم الرقعى :

*******************

سبحان كيف لفاله 

غلانا اللى توا نقص مكياله

ياما زهينا في ايام اقباله 

ناصحاله وبيه دليتينى

واليوم بارمه عنا او عن مواله 

خنتى الفاظ العهد واكرهتينى

عليك درت عزم واجد مو باحياله 

حرمت ذكرتك فى السهو والتعينى

سبحان كيف انسيبه 

غلا قبل كان ابشهوته فى طيبه

ابقى من اسباب الخطو فيه الغيبه 

وابقيت جاحده فى العقل ومردينى

وبعد ما مغالى سد باب نصيبه 

وقالو نقص وانا اللوم اخطينى

نشطب عليه بابًجمر باب سريبه 

وبالنار نحرقه وانشوف من يرضينى

سبحان كيف انهونه 

غلا قبل ولانى او قابل عونه

لو ما عزيز بادر ابفعل الخونه 

كنت بالوفا عابى اوفاسرع حينى

لكن ارضى لخلاف سود اعيونه 

نكرنى برم عهده امعا لاخرينى

مالى حسايف عن رطب عرجونه 

كليت خيرته فى شهوت التعيينى

سبحان كيف تهاضى 

غلا قبل كاين فى القلوب تماضى

وسبحان من مغالى كيف خان الفاظه 

اللى قبل نا وياه متفقينى

اليوم بالغلا برم مع الحراضه 

ندمت فى غلاى امعاه شوه زينى

سبحان كيف اتخونى 

وسبحان يامرادى من يقول اتهونى

سياتك محن ذكراك من مكنونى 

ولا لك احقوق ان كان عاتبتينى

حساد الغلا تبعتى بعد كرهونى 

او فى قولهم بالكذب ظنيتينى

واعلنتى خطاى معاك جا فى كونى 

ونا معاك صادق فى الغلا بيمنى

سبحان كيف صبرنا 

وكيف نا وانت ع الغلا هاجرنا

الياس من شورك خش خاض بحرنا 

لا فيه نتيتى ولا انذرتينى 

الوان الغلا جضًن شاع خبرنا 

او تم فى افواه الناس صيته شينى

الشاعر نصر آدم الرقعى 

******************

سبحان كيف توارى 

اوسبحان يا مرادى كيف راح اخساره

حبا كوانا فى القلوب ابناره 

اوعلي بقاه عاهدتك او عاهدتينى

خضعنا الحكمه تحت طوع اماره 

سلطان حب وحدنا احنا لاثنينى

اوعملنا على صونه وكتم اسراره 

وبتى عليه مطمانه او طمنتينى

كلا من اصحاب الحسد والمكاره 

لا جو فى احساباتك ولا تخمينى

غير عابيين بفتنهم واخطاره 

امغامرين فى بحر الهيام اسنينى

وانرحنا ضحية حب موش اخساره 

ايجى يوم وانلاقيك واتلاقينى

وانعشنا انالو من معين انهاره 

تطفاى لظماك انت ونا يروينى 

ولازم نتقاسم حلوته وامراره 

بالروح يا نفداك يا تفدينى

هذين هن اهداف الحب يا مكاره 

يا مخادعه ياللى قليلة دينى

ايام وغلاك امعاى توقد ناره 

على كل ما نبيه شجعتينى

حتى نين اسياجك هدمت اسواره 

وطيت فى حرم حبسك وسامحتينى

ومعاك وين ما حبى نقص تياره 

درتى العيب جا منى اوهو خاطينى

وساندوك روًاج الخطا وانصاره 

خذيتى بخاطرهم او جافيتينى

خضعت الحكم الياس واستعماره 

اوهنتى سريب غلاى وانسيتينى

اونا اللى خطاك شربت كاس امراره 

حتى ان سم عليه زريتينى

خذيته وانا عالم بكل اضراره 

انضحى بكل نفيس كى هنتينى

عازم على تركك عملت ادباره 

وان كان لك ضمير ايحس ما لمتينى

وحبك امحى م القلب طفيت ناره 

ردمته بسياتك حسب تظنينى

وابقى طيف خيالك امغير شراره 

تلوح فى سما ذهنى بها ياتينى 

حتى لو انسيته باقيات آثاره 

ايجى نصب تذكاره اقبالة عينى 

الشاعر محمد خليل العريضه

******************

سبحان من وازاها

الغيه اللى سمعوا الناس نباها

رفعتى رفعت لوفوق علًيناها

شقيتى بها واجد وشقيتينى

زصار اعتنا واخلاص فى مبداها

ومن نار الغلا صفتى وصفيتينى

وما من عواصف ياس صارعناها

وكم وعد خافى فيه واعدتينى

جيتى وجيتت الغابيه كلناها

م الراس للقدم نحرك و ما تنهينى

واليوم يا مرادى ناكه مدعاها

وانا زاد صاحب عزم لو ريتينى

نكرتى نكرتك هو رد كفاها

رخيتى عزقتك قبل لا ترخينى

محاضر املاف غلاك شرًطناها

واليوم عاد هاوينك و نا هاوينى

لعبتى لعباتك و سكرناها

برمتى خطيتك باى باى خاطينى